Contempt of Court Case in AP: కోర్టు ధిక్కరణ కేసులో రాజంపేట సబ్ కలెక్టర్ ఖేతన్‌ గార్గ్‌కు, ఏపీఎండీసీ సీపీవో సుదర్శన్‌రెడ్డికి జైలుశిక్ష, జరిమానా విధిస్తూ ఏపీ హైకోర్టు తీర్పు ఇచ్చింది. పరిహారం కేసులో కోర్టు ఆదేశాలను బేఖాతారు చేసిన ఇద్దరికీ 6 నెలల జైలుశిక్ష, రూ.2 వేల చొప్పున జరిమానా విధించింది. వివరాల్లోకి వెళితే.. అన్నమయ్య జిల్లా ఓబులవారిపల్లె మండలం మంగంపేటకు చెందిన నరసమ్మ 2003లో మైనింగ్లో భాగంగా తన ఇంటిని కోల్పోయింది. దీంతో ఆమెకు పరిహారం చెల్లించాలని గతంలో హైకోర్టు ఆదేశాలు జారీ చేసింది.
అయితే.. హైకోర్టు ఆదేశాలు ఇచ్చినా.. అధికారులు మాత్రం పరిహారం చెల్లించలేదు. దీంతో ఆమె కోర్టు ధిక్కరణ పిటిషన్ దాఖలు చేశారు. వ్యాజ్యంపై పిటిషనర్ తరఫు న్యాయవాది శ్రీనివాస్ ఇవాళ వాదనలు వినిపించారు. విచారణ అనంతరం ఇద్దరు అధికారులకు జైలుశిక్ష, జరిమానా విధిస్తూ.. వారంలోగా కోర్టు ముందు హాజరుకావాలని హైకోర్టు ఆదేశాలు జారీ చేసింది.