తెలంగాణలోని ద్వితీయశ్రేణి నగరాలకు ఐటీ విస్తరణ: కేటీఆర్‌

15:19 December 05

రాష్ట్రంలోని ద్వితీయశ్రేణి నగరాలకు ఐటీ పరిశ్రమ విస్తరణ: కేటీఆర్‌

ఐటీ, పరిశ్రమల శాఖలపై ప్రగతి భవన్​లో మంత్రి కేటీఆర్ సమీక్ష నిర్వహించారు. ఐటీ పరిశ్రమలను నగరంలోని ఇతర ప్రాంతాలతో పాటు.. రాష్ట్రంలోని ద్వితీయశ్రేణి నగరాలకు విస్తరించే ప్రణాళికలు, కార్యచరణపై అధికారులతో చర్చించారు. సోమవారం ఖమ్మం పట్టణంలోని ఐటీ టవర్​ను ప్రారంభించనున్నట్లు మంత్రి ప్రకటించగా.. మహబూబ్​నగర్, ఖమ్మం, వరంగల్ నగరాల్లో ఐటీ పరిశ్రమలు మరింత విస్తరించేందుకు ఏర్పాట్లు ముమ్మరం చేస్తున్నట్లు తెలిపారు.  

ఒకటి రెండు ప్రముఖ కంపెనీలు త్వరలోనే వరంగల్ నగరానికి వస్తాయని, ఇందుకు సంబంధించి ఆయా కంపెనీలతో తెలంగాణ ఐటీ శాఖ చర్చలు నిర్వహిస్తుందన్నారు. వరంగల్​లో ఐటీ కంపెనీల కార్యకలాపాల విస్తరణకు అవసరమైన మౌలికసదుపాయాల కల్పనపై టీఎస్ఐసీ ప్రతినిధులతో వివరాలు అడిగి తెలుసుకున్నారు. కొంపల్లి ప్రాంతంలో ఒక ఐటీ పార్క్ నిర్మాణానికి సంబంధించి అవసరమైన భూసేకరణ త్వరగా పూర్తిచేసి.. శంకుస్థాపనకు ఏర్పాట్లు చేయాలని టీఎస్​ఐఐసీ ఎండీ నరసింహరెడ్డికి మంత్రి ఆదేశాలు జారీ చేశారు.  

మహబూబ్​నగర్ దివిటిపల్లి ప్రాంతంలో అనేక కంపెనీలు పెట్టుబడులు పెట్టేందుకు ముందుకు వస్తున్నాయని కేటీఆర్ తెలిపారు. వాటికి సంబంధించి కూడా పూర్తి వివరాలను త్వరలోనే వెల్లడిస్తామన్నారు. 

ఇదీ చదవండి :రైతుబంధు నిధులు, పంపిణీపై సోమవారం సీఎం​ సమీక్ష