క్రమశిక్షణ ముఖ్యం..
'ఫ్రీలాన్సింగ్ అంటే ఇంట్లో చేసుకునేదే కదా! మనకి కుదిరినప్పుడు, నచ్చినంతసేపు ఇష్టం వచ్చినట్లు పని చేసుకోవచ్చులే!'- ఫ్రీలాన్సింగ్ అనగానే చాలామంది మదిలో మెదిలే ఆలోచనలు ఇలానే సాగుతాయి. అయితే అది పూర్తిగా పొరపాటు. చేసే పనిలో నాణ్యత కొరవడకుండా ఉండాలంటే అందుకు తగిన క్రమశిక్షణ కలిగి ఉండడం కూడా చాలా అవసరం.
ఇంటివద్ద ఉన్నా అంతే నిబద్ధత అవసరం...
ఆఫీసుకి వెళ్తే ఎంత నియమ, నిబద్ధతలతో పని చేస్తామో ఇంటి పట్టున ఉండి చేసే పనిలో కూడా అలానే ఉండాలి. ముఖ్యంగా బద్ధకాన్ని మన దరి చేరనీయకూడదు. లేదంటే అది వాయిదాల పర్వానికి తెర తీసి రాణించాలనుకున్న కెరీర్‌ని కాస్తా అటకెక్కిస్తుంది.
ప్రాథమికాంశాలపై అవగాహన..
ఫ్రీలాన్సింగ్ చేయాలని అనుకుంటున్నారు.. బాగానే ఉంది.. మరి, దానికి సంబంధించిన ప్రాథమికాంశాలపై కూడా అవగాహన ఉండాలి కదా! అందుకే మీరు పని చేయాలనుకుంటున్న రంగంలో పరిస్థితులు ఎలా ఉన్నాయో ఒకసారి నిపుణులను అడిగి తెలుసుకోవడం లేదా అదే రంగంలో పని చేస్తున్న పరిచయస్థుల ద్వారా వాకబు చేసి వివరాలు సేకరించడం.. వంటివి చేయాలి.
అలా చేస్తే అవగాహన ఏర్పడుతుంది...
తద్వారా ప్రస్తుతం సంస్థలు మనలో కోరుకుంటున్న నైపుణ్యాలు, పని గంటలు, ప్రాజెక్టు వివరాలు, డబ్బు చెల్లించే విధానం.. మొదలైన అంశాలపై ఒక అవగాహన ఏర్పడుతుంది. దీని ద్వారా మనం ఎంత సేపు పని చేయాలి? మన కష్టానికి ప్రతిఫలంగా సంస్థ నుంచి ఎంత ఆశించవచ్చు.. అనే అంశాల్లో మనమూ ఒక అంచనాకి వచ్చే వీలు ఉంటుంది.
నెట్‌వర్క్ కూడా ముఖ్యమే..
ప్రస్తుతం ఏ రంగంలో రాణించాలన్నా అందుకు తగినవిధంగా నెట్‌వర్క్ కలిగి ఉండడం కూడా ముఖ్యమైన అంశాల్లో ఒకటిగా మారిపోయింది. ఈ క్రమంలో మీరు ఫ్రీలాన్సింగ్ చేయాలనుకునే రంగంలో మీకు తెలిసిన వారితో మీరూ ఒక నెట్‌వర్క్ ఏర్పాటు చేసుకోవడం మంచిది. దాని ద్వారా ఆయా రంగాల్లో వస్తున్న మార్పులు- చేర్పుల గురించే కాకుండా కొత్త ఒరవడుల గురించి కూడా తెలుసుకోవచ్చు. అలాగే ఆయా రంగాల్లో ఉన్న అవకాశాల విస్తృతి గురించి మనకు తెలుస్తుంది.