భార్య ఏదైనా కోరిక కోరితే.. "చూద్దాంలే.. చేద్దాంలే.. అది మన తాహతుకు మించింది.. మన వల్ల కాదు.. మనకవసరమా.." అంటూ వాయిదాలు వేస్తూ తప్పించుకునే భర్తలున్న ఈ రోజుల్లో.. చనిపోకముందు అర్ధాంగి కోరిన ఓ ఖరీదైన కోరికను మర్చిపోకుండా ఏకంగా ముప్పై ఏళ్ల తర్వాత.. 88 ఏళ్ల వయసులో నెరవేర్చాడు ఈ భర్త. సహధర్మచారిణి చివరికోరికను తీర్చేందుకు నిరంతరం శ్రమించి.. పైసాపైసా కూడబెట్టి.. షిరిడీ సాయికి 40 లక్షల రూపాయల విలువైన 742 గ్రాముల బంగారు కిరీటాన్ని సమర్పించారు హైదరాబాద్కు చెందిన డాక్టర్ రామకృష్ణ.
డాక్టర్ రామకృష్ణ, రత్నమాంబ దంపతులు గతంలో హైదరాబాద్లో ఉండేవారు. డా. రామకృష్ణ.. గాంధీ ఆస్పత్రిలో సర్జన్గా విధులు నిర్వహించారు. ఉద్యోగ విరమణ అనంతరం పలు వైద్యకళాశాలల్లో ప్రొఫెసర్గా, డీన్గా పనిచేశారు. రామకృష్ణ దంపతులకు ఇద్దరు కుమారులు, ఇద్దరు కుమార్తెలుండగా... వాళ్లంతా అమెరికాలో స్థిరపడ్డారు. ఆయన కూడా ప్రస్తుతం వాళ్లతో కలిసి అమెరికాలోనే ఉంటూ.. కాలిఫోర్నియా యూనివర్సిటీలో డీన్గా విధులు నిర్వర్తిస్తున్నారు. కాగా.. పిల్లలతోసహా వచ్చి షిరిడీ సాయికి బంగారు కిరీటాన్ని సమర్పించారు. దీంట్లో ఏముంది అనుకుంటున్నారా..? అయితే.. 1992లో రామకృష్ణ దంపతులకు జరిగిన ఓ సన్నివేశం తెలుసుకోవాల్సిందే..!
1992లో ఒకసారి కుటుంబంతో కలిసి సాయిబాబా దర్శనం కోసం షిరిడీకి వెళ్లారు. సాయి హారతి సమయంలో అనుకోకుండా అక్కడున్న పూజారి.. బాబాకు అలంకరించిన కిరీటాన్ని తీసి రత్నమాంబ చేతిలో పెట్టారు. "ఇలాంటి కిరీటాన్ని మీరు కూడా బాబాకు చేయించాలి.." అని చెప్పారు. ఈ ఊహించని మాటలకు ఆశ్చర్యపోయిన రత్నమాంబ పక్కనే ఉన్న రామకృష్ణను.. "అంత ఖరీదైన కిరీటాన్ని మనం చేయించగలమా.." అన్నట్టుగా చూసింది. ఆమె భావాన్ని అర్థం చేసుకున్న రామకృష్ణ.. అంతా బాగా జరిగితే.. చేయిద్దాం అని భరోసా ఇచ్చాడు. ఈ ఘటన జరిగిన రెండు నెలలకు అంటే.. 1992 నవంబర్లో రత్నమాంబ కన్నుమూశారు.
భార్యవియోగంతో బాధతో కుంగిపోకుండా పిల్లలకు మంచి చదువులు అందించి.. అందరికీ పెళ్లిళ్లు చేశారు. పిల్లలంతా అమెరికాలో స్థిరపడటంతో.. రామకృష్ణ మాత్రం ఒంటరిగా మిగిలిపోయారు. వయసుపైబడటంతో.. ఒంటరిగా ఉన్న తండ్రిని పిల్లలు అమెరికాకు తీసుకెళ్లారు. కానీ.. భార్య అడిగిన కోరిక తనను ఊరికే కూర్చోనివ్వలేదు. అమెరికాలో కూడా రామకృష్ణ ఊరికే కాలక్షేపం చేయకుండా.. పలు వైద్యశాలల్లో ప్రొఫెసర్గానూ.. డీన్గానూ.. పనిచేశారు. వచ్చిన డబ్బును జాగ్రత్తగా పోగు చేసుకున్నారు. ముప్పై ఏళ్లుగా భార్య అడిగిన కోరికను నెరవేర్చేందుకు తన పరిధిలో నిరంతరం శ్రమించారు. చివరికి.. అనుకున్నంత డబ్బు పోగయ్యాక ఇండియాకు వచ్చి... హైదరాబాద్లో బంగారు కిరీటాన్ని తయారు చేయించారు. తన భార్య అడిగిన కోరిక మేరకు పిల్లలతో సహా షిరిడీ వచ్చి.. బంగారు కిరీటాన్ని బాబాకు సమర్పించారు.