నిర్లక్ష్యం కారణంగా.. 8 నెలల చిన్నారికి హెచ్​ఐవీ

బ్లడ్​ బ్యాంకు, వైద్యసిబ్బంది నిర్లక్ష్యం కారణంగా ముక్కుపచ్చలారని చిన్నారికి హెచ్​ఐవీ సోకింది. ఇదే విషయంపై రాష్ట్ర వైద్యశాఖ మంత్రికి ఫిర్యాదు చేశారు చిన్నారి తల్లిదండ్రులు. ఈ షాకింగ్ ఘటన మహారాష్ట్రలో జరిగింది.

మహారాష్ట్ర, అకోలాలో బ్లడ్ బ్యాంకు, వైద్యసిబ్బంది చేసిన చిన్న నిర్లక్ష్యం కారణంగా.. 8 నెలల చిన్నారి జీవితం అంధకారంలో పడింది. ఆ చిన్నారికి హెచ్​ఐవీ సోకింది.

ఏం జరిగిందంటే..?

మహారాష్ట్ర, అకోలా జిల్లా ముర్తిజాపుర్​ మండలంలోని హిర్​పుర్​కు చెందిన దంపతులకు 8 నెలల క్రితం పాప పుట్టింది. చిన్నారి జన్మించిన మూడు రోజుల తర్వాత అనారోగ్యం తలెత్తగా.. ముర్తిజాపుర్​లోని పిల్లల ఆస్పత్రికి తీసుకొచ్చారు. పలురకాల వైద్యపరీక్షలు నిర్వహించిన డాక్టర్లు.. చిన్నారికి రక్తకణాలు తక్కువగా ఉన్నాయని.. వెంటనే రక్తం ఎక్కించాలన్నారు. దీంతో ఆ తల్లిదండ్రులు అకోలాలోని బీపీ ఠాక్రే బ్లడ్​బ్యాంకు నుంచి రక్తాన్ని తీసుకొచ్చారు. వైద్యులు ఆ రక్తాన్ని చిన్నారికి ఎక్కించారు.

అయితే.. ఇటీవల చిన్నారికి అనారోగ్యం తలెత్తగా వైద్యపరీక్షలు నిర్వహించారు డాక్టర్లు. చిన్నారికి హెచ్​ఐవీ పాజిటివ్ ఉన్నట్లు పరీక్షల్లో తేలింది. వెంటనే బాలిక తల్లిదండ్రులకూ పరీక్షలు నిర్వహించారు. వారిద్దరికీ నెగెటివ్ వచ్చింది. దీంతో చిన్నారికి హెచ్ఐవీ సోకిన వ్యక్తి రక్తం ఎక్కించారని నిర్ధరించారు.

విషయం తెలుసుకున్న తల్లిదండ్రులు.. కేంద్ర ఆరోగ్యశాఖ మంత్రికి ఫిర్యాదు చేశారు.

ఇదీ చూడండి:gold seized: అధికారులే అవాక్కయ్యేలా... ఇలా కూడా బంగారం తరలించొచ్చా..!