విచారణ ఉంటే.. సస్పెండ్​ చేయవచ్చు : హైకోర్టు

ఉద్యోగం నుంచి సస్పెండ్​ చేయడాన్ని శిక్షగా పరిగణించరాదని.. అది కేవలం యజమానికి, ఉద్యోగికి మధ్య బంధాన్ని నిలిపివేయడమేనని హైకోర్టు పేర్కొంది. జగిత్యాలకు చెందిన డిప్యూటి తహశీల్దార్​ పి.నరసింహాచారిని ప్రభుత్వం సస్పెండ్​ చేసిన విషయంలో హైకోర్టు ప్రభుత్వాన్ని సమర్థించింది.

ఉద్యోగిని విధుల నుంచి సస్పెండ్​ చేయడాన్ని శిక్షగా పరిగణించరాదని.. యజమానికి, ఉద్యోగికి మధ్య బంధాన్ని నిలిపివేయడమే అని హైకోర్టు తీర్పు చెప్పింది. తెలంగాణ సివిల్​ సర్వీసెస్​ నిబంధనల ప్రకారం శాఖాపరమైన విచారణ, క్రిమినల్ కేసు పెండింగ్​లో ఉన్నట్టయితే.. సదరు ఉద్యోగిని సస్పెండ్ చేయవచ్చని ఉన్నత న్యాయస్థానం స్పష్టం చేసింది. జగిత్యాలకు చెందిన డిప్యూటి తహశీల్దార్ పి.నరసింహాచారిని ప్రభుత్వం సస్పెండ్​ చేయడాన్ని హైకోర్టు సమర్థించింది. 2005-06లో వచ్చిన ఆరోపణలపై ఈ ఏడాది జులై నెలలో తనను సస్పెండ్​ చేయడాన్ని సవాల్​ చేస్తూ.. నరసింహాచారి హైకోర్టును ఆశ్రయించారు.

విచారణ జరిపిన సింగిల్​ జడ్జి పిటిషన్​ను కొట్టివేయగా.. నరసింహాచారి అప్పీలు దాఖలు చేశారు. అప్పీల్​పై ప్రధాన న్యాయమూర్తి జస్టిస్​ ఆర్​.ఎస్​. చౌహన్​, జస్టిస్​ టి.వినోద్​ కుమార్​లతో కూడిన ధర్మాసనం విచారణ చేపట్టింది. తనను వేధించే ఉద్దేశ్యంతోనే 14 ఏళ్ల తర్వాత తనను సస్పెండ్​ చేశారని పిటిషనర్​ వాదించారు. అయితే.. వాదనలు విన్న ధర్మాసనం సర్వీసు నిబంధనల ప్రకారం శాఖాపరమైన విచారణ, క్రిమినల్​ కేసు పెండింగ్​లో ఉంటే.. సదరు ఉద్యోగిని సస్పెండ్​ చేసే అధికారి ప్రభుత్వానికి ఉందని ధర్మాసనం తీర్పు చెప్పింది. అయితే.. సస్పెన్షన్​పై శాఖాపరమైన అప్పీలు చేసుకోవచ్చని సూచిస్తూ.. నరసింహాచారి అప్పీల్​ పిటిషన్​ను కొట్టివేసింది.

ఇదీ చూడండి :పంచాయతీలో అవినీతిపై దీక్ష.. భగ్నం చేసేందుకు పోలీసుల యత్నం