రాష్ట్రవ్యాప్తంగా రాత్రి కురిసిన కుండపోత వర్షం జనాలకు తీవ్ర ఇబ్బందులకు గురిచేసింది. వర్షం తగ్గినా.. దాని తాలూకు ప్రభావం మాత్రం ఇంకా కొనసాగుతోంది. వాగులు, వంకలు పొంగిపొర్లుతున్నాయి. చెరువులు, కుంటలు అలుగులు పారుతున్నాయి. లోతట్టు ప్రాంతాలు జలమయమయ్యాయి. రోడ్లపైకి వరద నీరు చేరటంతో ప్రజలు తీవ్ర ఇబ్పందులు ఎదుర్కొంటున్నారు. హైదరాబాద్లో..
కుంభవృష్టిలా కురుస్తున్న వర్షాలతో హైదరాబాద్ ప్రజలు అల్లాడుతున్నారు. అరగంట నుంచి గంట వ్యవధిలోనే శనివారం మధ్యాహ్నం ఏకధాటిగా పలు ప్రాంతాల్లో వాన పడింది. రహదారులు జలమయమై రాకపోకలకు తీవ్ర ఇబ్బందులు ఎదురయ్యాయి. ఎగువ నుంచి భారీ వరద రావడంతో మూసారాంబాగ్‌ బ్రిడ్జి నీట మునిగింది. అంబర్‌ పేట, దిల్‌సుఖ్‌నగర్‌ మధ్య సాయంత్రం వరకు రాకపోకలు నిలిచిపోయాయి. యాకత్‌పురా లోతట్టు బస్తీ, సైదాబాద్‌లోని పలు కాలనీల్లోని ఇళ్లలోకి వరద చేరింది. అంబర్‌పేటలోని ఆబ్కారీ కార్యాలయంలో అడుగు లోతు నీరు నిలిచింది.
యాదాద్రిలో...
యాదాద్రి భువనగిరి జిల్లాలోని మూసీ నదికి వరద పోటెత్తింది. యాదాద్రి భువనగిరి జిల్లా వ్యాప్తంగా నిన్న 355.6 మిల్లీమీటర్ల వర్షపాతం నమోదైంది. జిల్లాలో అత్యధికంగా సంస్థాన్ నారాయణపురంలో 109 మిల్లీమీటర్ల వర్షపాతం నమోదైంది. ఆలేరు, రాజపేట, యాదగిరిగుట్ట, వలిగొండ మండలాల్లో ఓ మోస్తరు వర్షం కురిసింది. జిల్లాలోని సంగెం-బొల్లేపల్లి గ్రామాల మధ్య ఉన్న భీమలింగం వద్ద లోలెవెల్ బ్రిడ్జిపై నుంచి మూసి నది ఉద్ధృతంగా ప్రవహిస్తుంది. సంగెం-బొల్లేపల్లి పరిసర గ్రామాల ప్రజల రాకపోకలకు అంతరాయం కలిగింది. యాదాద్రి భువనగిరి జిల్లా చౌటుప్పల్ పురపాలిక కేంద్రం జలమయమైంది. స్థానిక చెరువు పూర్తిగా నిండి అలుగు పారుతోంది. ఆ నీళ్లతో జాతీయ రహదారి పక్కన ఉన్న సర్వీస్ రోడ్డు పూర్తిగా మునిగిపోయింది. రోడ్డు పక్కనే ఉన్న వ్యాపార సముదాయాల్లోకి నీరు ప్రవేశించింది. లోతట్టు ప్రాంతాలు నీట మునిగాయి.
రంగారెడ్డిలో..
రంగారెడ్డి జిల్లాలో శనివారం భారీ వర్షం కురిసింది. కుండపోతగా కురిసిన వానకు అబ్దుల్లాపూర్‌మెట్లోని చింతలచెరువు నిండి పొంగిపొర్లుతోంది. విజయవాడ జాతీయ రహదారి మీదుగా ఇనాంగూడ వద్ద బాట చెరువు అలుగు పారుతోంది. బాట చెరువు అలుగు పారడంతో విజయవాడ హైవే మీదకు నీరొచ్చి.. వాహనదారులు తీవ్ర ఇబ్బందులు పడుతున్నారు. వరద నీటి వల్ల వాహనాలు నిలిచిపోయి ట్రాఫిక్ జామ్ ఏర్పడింది. స్థానిక పోలీసులు ట్రాఫిక్ నియంత్రించేందుకు ప్రయత్నిస్తున్నారు. బాటసింగారం నుంచి మజీద్పూర్కు వెళ్లే దారిలోని వాగు, లష్కర్గూడ వాగులు కూడా పొంగిపొర్లుతున్నాయి. ఈ వాగుల వద్ద పోలీసులు బారికేడ్లు పెట్టి రాకపోకలు నిలిపివేశారు.
సిరిసిల్లలో...
రాజన్న సిరిసిల్ల జిల్లా కేంద్రంలో రాత్రి కురిసిన వర్షానికి లోతట్టు ప్రాంతాలన్ని జలమయమయ్యాయి. భారీ వర్షానికి పట్టణంలోని పాత బస్టాండ్తో పాటు పలు కాలనీలు నీట మునిగాయి. కొత్త చెరువు మత్తడి దూకుతుండటం వల్ల దిగువన ఉన్న శాంతినగర్, అంబేడ్కర్నగర్, తదితర కాలనీలలో ఇళ్లలోకి నీరు చేరి.. ప్రజలు తీవ్ర ఇబ్బందులు పడ్డారు. సిరిసిల్ల- కరీంనగర్ ప్రధాన రహదారిపై భారీగా వరద నీరు ప్రవహించడంతో వాహనాల రాకపోకలకు ఆటంకం కలిగింది.
సిద్దిపేటలో...
సిద్దిపేట జిల్లా కోహెడ మండలం బస్వాపూర్ వద్ద ఉన్న మోయ తుమ్మెద వాగు ఉద్ధృతంగా ప్రవహిస్తోంది. ప్రధాన రహదారి వంతెన పైనుంచి వరద నీరు ప్రవహిస్తుండడంతో సిద్దిపేట- హన్మకొండ రోడ్డుపై వాహనాల రాకపోకలను నిలిపేశారు. వంతెనపై నుండి వాగు ఉధృతంగా ప్రవహించడం ఈ వానాకాలంలో ఇది ఆరోసారి కావటం గమనార్హం. పోరెడ్డిపల్లి, నాగసముద్రాల మీదుగా హన్మకొండకు వాహనాలను దారి మళ్లించారు.