తెలంగాణ సన్న రకం వంగడాలకు దేశమంతా గిరాకీ!

దేశంలో సన్నబియ్యానికి డిమాండ్ పెరుగుతోంది. కాటన్‌ దొర సన్నాలు, సాంబమసూరి రకాలకు భారీ డిమాండ్ ఏర్పడింది. వినియోగదారుల అభిరుచి మేరకు... అధిక శాతం రైతులు సన్న రకాల వరి సాగుకు ప్రత్యేక శ్రద్ధ చూపుతున్నారు. డిమాండ్‌ను దృష్ట్యా తెలంగాణ రాష్ట్ర విత్తనాభివృద్ధి సంస్థ... 5.42 లక్షల క్వింటాళ్ల విత్తనాలు పండిస్తోంది. అనుకూల వాతావరణం, సాగునీరు ఆశాజనకంగా ఉన్నందున... ఈ రబీ సీజన్‌లో వరి విత్తనాలకు మరింత కొరత ఏర్పడే అవకాశం కనిపిస్తోంది.

సన్న రకం వరి ధాన్యం పండించడానికే అధిక శాతం రైతులు ఎక్కువగా మొగ్గు చూపుతున్నారు. తెలుగు రాష్ట్రాలే కాకుండా చాలా రాష్ట్రాల వ్యవసాయశాఖలు... తెలంగాణలో పండే సన్న రకం వరి విత్తనాల కోసం ప్రతిపాదనలు పంపాయి. ప్రస్తుత ఆర్థిక సంవత్సరంలో 5లక్షల 42వేల క్వింటాళ్ల ధాన్యాన్ని... రాష్ట్ర విత్తనాభివృద్ధి సంస్థ ఉత్పత్తి చేస్తోంది. క్షేత్రస్థాయిలో రైతులకు ఈ విత్తనాలను వ్యవసాయశాఖ రాయితీపై విక్రయిస్తోంది.

వ్యవసాయ శాఖ అంచనాల ప్రకారం క్వింటాల్ వరి విత్తనం మూడు ఎకరాల విస్తీర్ణానికి సరిపోతుంది. ఈ లెక్కన ప్రభుత్వ సంస్థలు అమ్మే విత్తనాలే 16 లక్షల 50 వేల ఎకరాలకు సరిపోతాయి. ప్రైవేటు విత్తన కంపెనీలు కూడా సన్న రకాలనే అత్యధికంగా విక్రయిస్తున్నందున విస్తీర్ణం ఇంకా పెరగనుంది. ఈ ఏడాది రైతులతో ప్రభుత్వం 10 రకాల విత్తన పంటలు సాగు చేయించింది. వీటిలో ప్రధానంగా 4 రకాల పంటలే 50 శాతానికి పైగా ఉండటం గమనార్హం.

కొత్త వంగడాలకు ప్రోత్సహం

కాటన్ దొర సన్నాలు, ఎంటీయూ 1010 వరి రకం తెలుగు రాష్ట్రాల్లో అత్యధికంగా 49 లక్షల ఎకరాల్లో సాగవుతున్నట్లు అంచనా. ఇందులో దాదాపు మూడో వంతు సాగు చేస్తున్న కాటన్ దొర సన్నాలను 2 లక్షల 4 వేల క్వింటాళ్ల విత్తనాలు పండించాలని లక్ష్యంగా పెట్టుకున్నారు. ఒకే రకం వంగడాన్ని ఏళ్ల తరబడి ఒకే పొలంలో సాగు చేస్తే దిగుబడి పెరగదని... కొత్త వండగాలు ప్రోత్సహించాలని కేంద్ర వ్యవసాయ శాఖ అన్ని రాష్ట్రాలకు సూచించింది.

బీపీటీకి డిమాండ్

తెలుగు రాష్ట్రాల్లో సాంబమసూరి-బీపీటీ 5204 అధికంగా సాగు చేస్తున్నారు. ఇది మార్కెట్‌లోకి వచ్చి 25 ఏళ్లు దాటిపోయింది. దీన్ని తగ్గించి ఇతర కొత్త వంగడాలను ప్రోత్సహించాలని, దీనిపై వచ్చే రాయితీని కేంద్రం 1000 నుంచి 500 రూపాయలకు తగ్గించింది. ప్రస్తుత ఏడాది 96 వేల 547 క్వింటాళ్ల సాంబమసూరి విత్తనాలను పండించేందుకు రైతులతో సాగు చేయిస్తున్నారు. ఇది రాష్ట్రంలో అత్యధిక విస్తీర్ణంలో సాగవుతున్న మూడో రకం వరి కావడం గమనార్హం.

తమిళనాడు, ఛత్తీస్‌గఢ్‌, ఉత్తరప్రదేశ్‌ ఎక్కువగా సాంబమసూరి అడుగుతున్నందున ఎక్కువగా సాగుచేయిస్తున్నట్లు టీఎస్‌ సీడ్స్‌ సంచాలకులు డాక్టర్‌ కేశవులు తెలిపారు. స్వర్ణ రకం వరి విత్తనాలను పశ్చిమ్‌బంగ సర్కారు కొనుగోలు చేసేందుకు ఆసక్తి కనబరిచింది. రబీలో పండే వేరుశనగ విత్తనాలను వచ్చే జూన్‌లో కొనేందుకు ఏపీ సహ పలు రాష్ట్రాలు అడిగాయి.

ఇవీ చూడండి : గడ్డి అన్నారంలో కార్పొరేటర్​ అనుచరుల వీరంగం