సంపన్న వ్యాపార కుటుంబంలో పుట్టింది హర్సంజమ్ కౌర్. ముద్దుగా హ్యారీ అంటారు. ఇంగ్లండ్‌లో ఎంబీఏ చేసింది. కానీ కెరియర్‌లో ఎందుకో కుదురుకోలేదు. ఈలోపు పెళ్లయింది. వాళ్లది కోల్‌కతా అయినా భర్త ఉద్యోగరీత్యా చాలా సంవత్సరాలు ఎన్నో ఊళ్లలో గడిపారు. ఊరు మారిన ప్రతిసారీ ఇంటిని చక్కబెట్టుకోవడం ఆమెకి తెగ సరదాగా ఉండేది. కొత్తగా ఇల్లు సర్ది ముచ్చట పడుతున్నప్పుడు ఇంటీరియర్‌ డిజైన్‌ నేర్చుకుంటే ఇంకెంత బాగుండునో అనుకుని, ఆ కోర్సు చేసింది. తర్వాత అదే వృత్తి అయింది. అందులో విజయవంతమైంది. కానీ భర్త సంపాదన, తన కెరియర్‌తో పెద్దగా ఆనందమేమీ కలిగేది కాదు. మొదటినుంచీ ఆధ్యాత్మిక చింతన ఎక్కువ. అవసరార్థులని ఆదుకున్న రోజున సంతోషం కలిగేది. తన సిసలైన ఆసక్తి సేవ అనిపించేది.
2018లో ‘ఆంగన్‌’
ఒకసారి ‘అమ్మూకేర్‌’ అనే సంస్థ ట్రెక్కింగ్‌, మెడిటేషన్‌ల కోసం మౌంట్‌ కైలాశ్‌ ట్రిప్‌ వేసింది. కొంచెం మార్పు ఉంటుందని అక్కడికి వెళ్లింది. దేశ విదేశాల నుంచి ఎందరో వచ్చారు. వాళ్లలో ఒక్కరికీ డబ్బు, హోదాల రంది లేదు. అందరిలో సేవాతత్పరతే. ఆ యాత్ర ఆమె జీవనవైఖరిని మార్చేసింది. తానూ సేవ చేయాలనుకుంది. 2018లో ‘ఆంగన్‌’ ఆరంభించింది. అమ్మూకేర్‌ స్థాపకుని పేరుతో ప్రేమగా ‘మోహన్‌జీ కా ఆంగన్‌’ అంటారు. ఇళ్లలో హింసించే వ్యక్తుల వల్ల భార్యలకే కాదు పిల్లలకీ నరకమే. వాళ్లని ఆదరించాలనేది ఆమె తపన. కూలీలు తమ పిల్లల్ని ఇక్కడ వదిలి పనికి వెళ్తారు. వాళ్లకి చదువుతోబాటు ఆహారం, ఆరోగ్య సంరక్షణ కల్పిస్తుంది హ్యారీ. పేద కుటుంబాలకు నిత్యావసర సామగ్రితో మంత్లీ కిట్‌ ఇస్తుంది. పిల్లల్ని ఉత్సాహంగా ఉంచేందుకు ఆటపాటలూ, డ్రాయింగ్‌ పోటీలు నిర్వహిస్తుంది.