కొత్త సంఘాలతోనైనా సహకారం అందేనా..?

రాష్ట్రంలో సహకార సంఘాల బలోపేతంపై సర్కారు ప్రత్యేక దృష్టి సారించింది. రైతుల ప్రయోజనాల దృష్ట్యా 906 ప్రాథమిక వ్యవసాయ సహకార సంఘాలు ఉండగా... మరో 434 సొసైటీల ఏర్పాటు కోసం చకచకా ఏర్పాట్లు సాగుతున్నాయి. ప్రతి మండలానికి రెండు సంఘాలు తప్పనిసరి చేస్తూ ప్రభుత్వం చర్యలకు ఉపక్రమించింది. కొత్త సంఘాల కసరత్తు నేపథ్యంలో రైతులకు సహకారం అందేనా...? అన్న అంశంపై విస్తృత చర్చ సాగుతుండటం గమనార్హం.

రాష్ట్రంలో ప్రాథమిక వ్యవసాయ సహకార పరపతి సంఘాల (ప్యాక్స్‌) సంఖ్య భారీ ఎత్తున పెంచేందుకు సర్కారు విస్తృత కసరత్తు చేస్తోంది. ఈ నెలలో పురపాలక సంఘాల ఎన్నికల ప్రక్రియ జరుగుతున్నందున అవి పూర్తైన తర్వాత ఎప్పుడైనా సహకార సంఘాల ఎన్నికలు జరగవచ్చని అధికార వర్గాల అంచనా. తెలంగాణ ఆవిర్భావం తర్వాత ఇంత వరకూ సహకార సంఘాలకు ఎన్నికలు జరగలేదు. గత రెండేళ్లుగా ప్రతి ఆరు మాసాలకోసారి ఇం​ఛార్జీ పాలకవర్గాల పదవీకాలాన్ని ప్రభుత్వం పొడిగిస్తూ వస్తోంది. ప్రస్తుతమున్న గడువు వచ్చే నెల 5తో ముగియనుంది. మళ్లీ గడువు పొడగించాలా...? వద్దా...? ఎన్నికల నిర్వహణకు అనుమతిస్తారా అని సహకార శాఖ తాజాగా ప్రభుత్వాన్ని అడిగింది.

81 మండలాల్లో ఒక్క ప్యాక్స్​ కూడా లేదు..

మొత్తం 584 మండలాలు ఉండగా... 906 సహకార సంఘాలు ఉన్నాయి. కానీ, 81 మండలాల్లో కనీసం ఒక్కటి కూడా లేదు. మరికొన్ని మండలాల్లో 2 నుంచి 3 వరకు ఉన్నాయి. ఈ నేపథ్యంలో ప్రతి మండలాన్ని ఒక యూనిట్‌గా తీసుకుని కచ్చితంగా రెండు సంఘాలు ఉండేలా చర్యలు తీసుకోవాలని రాష్ట్ర ప్రభుత్వం ఉత్తర్వులు జారీ చేసింది. ఇవి ఏర్పాటైతే... వెంటనే ఎన్నికలకు వెళ్లే అవకాశాలు కూడా ఉన్నట్లు అధికారయంత్రాంగం భావిస్తోంది. రైతులకు గ్రామ స్థాయిలో అన్ని రకాల సేవలు వీటి ద్వారా అందించాలని ప్రభుత్వం లక్ష్యంగా పెట్టుకుంది. ప్రస్తుతం రసాయన ఎరువులు, క్రిమిసంహారక మందుల విక్రయాలు, ధాన్యం కొనుగోలు పరిమితంగా జరుగుతున్నాయి. ఇక నుంచి పంటల సాగుకు ముందుకు విత్తనాల విక్రయాలు మొదలుకుని పంట కోత తర్వాత కొనుగోలు దాకా అన్నీ రకాల సేవలు ప్యాక్స్‌ ద్వారా అందించాలని నిర్దేశించింది సహకార శాఖ.

కొత్త నిబంధనల ప్రకారం మరో సంఘం

ఇందుకోసం రైతులందరికీ దగ్గరలో అంటే ప్రతి 10 నుంచి 15 కిలోమీటర్ల పరిధిలోనే తప్పకుండా ఒక సంఘం ఉండేలా చూడాలని కసరత్తులు చేస్తోంది. కొత్త జిల్లాలు, మండలాల ఏర్పాటు తర్వాత మండల కేంద్రం నుంచి చివరి గ్రామానికి దూరం బాగా తగ్గింది. ఈ నేపథ్యంలో ప్రతిమండలానికి కనీసం రెండు సంఘాలుంటే ఎక్కువ శాతం రైతులకు 10 కిలోమీటర్ల దూరంలోనే సంఘం ఉంటుందని అంచనా. ప్రస్తుతం ఉన్న 584 మండలాల్లో 272 మండలాల్లో ఒక్కో ప్యాక్స్‌ మాత్రమే ఉంది. కొత్త నిబంధనల ప్రకారం వీటన్నింటికీ అదనంగా మరో సంఘం ఏర్పాటవుతుంది.

సహకారం అందేనా...?

వీటితో కలిపి కొత్తగా మొత్తం 434 ప్రాథమిక వ్యవసాయ సహకార పరపతి సంఘాలు ఏర్పాటు కానున్నాయి. కానీ, కొత్తగా ఏర్పాటయ్యే సంఘాలకు ఆర్థికంగా వనరులు కల్పించకపోతే... రైతులకు సేవలందించడం కష్టమవుతుందని ఇప్పటికే ఉన్న సంఘాల నేతలు వాపోతున్నారు. ప్రస్తుతం ఉన్న 906 సంఘాల్లో 300 పైగా సొసైటీలు ఆర్థికంగా ఎంతో ఇబ్బందులు పడుతున్నాయి. కొన్ని సంఘాలు రాష్ట్ర సహకార మార్కెటింగ్‌ సమాఖ్య - మార్క్‌ఫెడ్ నుంచి ఎరువులు కొని రైతులకు విక్రయించినా... మళ్లీ తిరిగి సమాఖ్యకు త్వరగా సొమ్ము చెల్లించడం లేదు. వీటిలో సిబ్బంది కూడా పలు అవినీతి, అక్రమాలకు పాల్పడుతూ ఎరువులను నల్లబజారులో అధిక ధరలకు విక్రయించి రైతులను దెబ్బతీస్తున్నారు. కొత్త సంఘాల ఏర్పాటులోనైనా ఇలాంటివి జరగకుండా చూడాలని సీనియర్ అధికారులు, రైతు వర్గాలు విజ్ఞప్తి చేస్తున్నారు.

ఇవీ చూడండి: ప్రతి జీవిలోనూ ఉంది.. అది గేదైనా.. ఏదైనా