భాగ్యనగరంలో గణేశ్ నిమజ్జనం రూట్ మ్యాప్ సిద్ధం.. ఆ మార్గాల్లో ట్రాఫిక్ ఆంక్షలు

Ganesh Immersion Route Map in Hyderabad: హైదరాబాద్‌లో ఘనంగా కొనసాగే సామూహిక వినాయక నిమజ్జనానికి అధికారయంత్రాంగం ఏర్పాట్లు పూర్తిచేసింది. నగరంలో ట్రాఫిక్‌ ఇబ్బందులు కలగకుండా పోలీసులు చర్యలు చేపడుతున్నారు. ఊరేగింపు జరిగే మార్గాల్లో రేపు ఉదయం ఆరు గంటల నుంచి శనివారం ఉదయం పది గంటల వరకు ఇతర వాహనాలను దారి మళ్లించనున్నారుట్యాంక్‌బండ్‌ పరిసర ప్రాంతాల్లో శనివారం సాయంత్రం వరకు ఆంక్షలు అమల్లో ఉండనున్నాయి. ఇతర రాష్ట్రాలు, జిల్లాల నుంచి రాకపోకలు సాగించే లారీలను ఆదివారం ఉదయం వరకు నగరంలోకి అనుమతించరు.

Ganesh Immersion Route Map in Hyderabad: భాగ్యనగరంలో గణేశ్​ నిమజ్జనోత్సవానికి సర్వం సిద్దమైంది. శోభాయాత్ర కొనసాగే అన్ని మార్గాల్లో పోలీసులు ఆంక్షలు విధించారు. శుక్రవారం ఉదయం నుంచి శనివారం ఉదయం పది గంటల వరకు ఆంక్షలు అమల్లో ఉండనున్నాయి. గణపతి విగ్రహాల ప్రధాన ఊరేగింపు కేశవగిరి నుంచి చాంద్రాయణ గుట్ట మీదుగా ఫలక్ నామా - ఆలియాబాద్ - నాగల్‌చింత - చార్మినార్ - అప్జల్ గంజ్- ఎంజె మార్కెట్ - అబిడ్స్ - బషీర్ బాగ్ - అంబేడ్కర్ విగ్రహం నుంచి ఎన్టీఆర్ మార్గ్, నక్లెస్ రోడ్ వైపు సాగుతోంది. సికింద్రాబాద్ నుంచి వచ్చే విగ్రహాలు రాష్ట్రపతి రోడ్డు - కర్బలా మైదానం - ముషీరాబాద్ - ఆర్టీసీ క్రాస్ రోడ్ - హిమాయత్ నగర్ వై జంక్షన్ మీదుగా వచ్చి లిబర్టీ వద్ద ప్రధాన ఊరేగింపులో కలుస్తాయి. హైదరాబాద్ తూర్పు మండలం నుంచి వచ్చే విగ్రహాలు ఉప్పల్ - రామాంతపూర్ - ఛే నంబర్ - దుర్గాభాయ్ దేశ్ ముఖ్ ఆస్పత్రి - ఫీవర్ ఆస్పత్రి - నారాయణగూడ మీదుగా వచ్చి ఆర్టీసీ క్రాస్ రోడ్ వద్ద ప్రధాన ఊరేగింపులో కలుస్తాయి.

దిల్​సుఖ్​నగర్ నుంచి వచ్చే వాహనాలు ఐఎస్‌సదన్ - సైదాబాద్ - చంచల్​గూడ మీదుగా వచ్చే పెద్ద విగ్రహాల ఊరేగింపులో కలుస్తాయి. తార్నాక నుంచి వచ్చే వాహనాలు ఓయూ డిస్టెన్స్ ఎడ్యుకేషన్ రోడ్, అడిక్ మెట్‌ మీదుగా ఫీవర్ ఆస్పత్రి వద్ద ప్రధాన ఊరేగింపులో కలుస్తాయి. టోలి చౌకి, మెహదీపట్నం నుంచి వచ్చే ఊరేగింపు మాసబ్ ట్యాంక్ - నిరంకారి భవన్ - సైఫాబాద్ పోలీస్‌ స్టేషన్ - ఇక్బాల్ మినార్ మీదుగా ఎన్టీఆర్ మార్గ్​కు వెళతాయి. ఎస్‌ఆర్ నగర్, అమీర్​ పేట, పంజాగుట్ట, ఖైరతాబాద్ వైపు నుంచి వచ్చే విగ్రహాలు మెహదీపట్నం నుంచి వచ్చే ఊరేగింపులో కలుస్తాయి. టపాచబుత్ర, సీతారాంబాఘ్, గోషామహాల్ బండారి, నుంచి వచ్చే విగ్రాహాలు ఎంజె మార్కెట్ వద్ద కలుస్తాయి. ఊరేగింపు జరిగే మార్గాల్లో రేపు ఉదయం ఆరు గంటల నుంచి శనివారం ఉదయం పది గంటల వరకు ఇతర వాహనాలను దారి మళ్లించనున్నారు. ట్యాంక్‌బండ్‌ పరిసర ప్రాంతాల్లో శనివారం సాయంత్రం వరకు ఆంక్షలు అమల్లో ఉండనున్నాయి. ఇతర రాష్ట్రాలు, జిల్లాల నుంచి రాకపోకలు సాగించే లారీలను ఆదివారం ఉదయం వరకు నగరంలోకి అనుమతించరు. ప్రధాన ఊరేగింపు సాగే మార్గాల్లో విగ్రహాలు తీసుకువస్తున్న వాహనాలకు తప్ప ఏ ఇతర వాహానాలకు అనుమతించమని ట్రాఫిక్ పోలీసులు తెలిపారు. వాహనదారులు ప్రత్యామ్నాయ మార్గాల ద్వారా వెళ్లాలన్నారు.

నిమజ్జనం చూసేందుకు వచ్చేవారి కోసం పోలీసులు ప్రత్యేక పార్కింగ్ ప్రదేశాలను సూచించారు. ఖైరతాబాద్ లోని ఇన్టిట్యూట్ ఆఫ్ ఇంజనీర్స్, ఖైరాతాబాద్ రైల్వే స్టేషన్, ఆనంద్ నగర్ కాలనీలోని రంగారెడ్డి జెడ్‌పీకార్యాలయం, బుద్ధభవన్ వెనుక, గో సేవా సదన్, లోయర్ ట్యాంక్ బండ్, కట్టమైసమ్మ గుడి, ఎన్టీఆర్ స్టేడియం, నిజాం కాలేజి, పబ్లిక్ గార్డెన్, ఐమ్యాక్స్ వద్ద పార్కింగ్ చేసుకుని అక్కడ నుంచి కాలినడకన రావాలని పోలీసులు సూచించారు. ఊరేగింపు మార్గాల్లో ఆర్టీసీ బస్సులకు అనుమతి ఉండదని పోలీసులు తెలిపారు. మహాత్మ గాంధీ బస్‌ స్టేషన్ నుంచి జిల్లాలు, ఇతర రాష్ట్రాలకు వెళ్లే ఆర్టీసీ బస్సులకు ప్రత్యామ్నాయ మార్గాలను సూచించారు. రాజీవ్ రహాదారి, ఎన్‌హెచ్ 7 నుంచి వచ్చే బస్సులు జేబీఎస్-వైసిఎంఏ-సంగీత్ క్రాస్ రోడ్-తార్నాక-నింబోలి అడ్డా-చాదర్​ఘాట్​ మీదుగా వెళ్లాలన్నారు. వాహనదారులు ప్రత్యామ్నాయ మార్గాలు తెలుసుకోవడానికి పోలీసు అధికారులు హెల్ప్‌లైన్‌ నెంబర్లు ఏర్పాటు చేశారు. అవసరమైన వారు 040 27852482, 9490598985, 9010203626 ఈ హెల్ప్‌లైన్‌ నెంబర్లను సంప్రదించాలని పోలీసు అధికారులు కోరారు. వాహనదారులు, ఉత్సవ నిర్వాహకులు నిబంధనలు, ఆంక్షలు పాటించి తమకు సహకరించాలని పోలీసు అధికారులు కోరుతున్నారు.

ఇవీ చదవండి: