Police Recruitment in Telangana : పోలీస్‌ కొలువుల సాధనకు యువతను సన్నద్ధం చేసే దిశగా కసరత్తు మొదలైంది. తెలంగాణ పోలీస్‌శాఖ ఉచిత శిక్షణ శిబిరాల ఏర్పాటులో నిమగ్నమైంది. ఎక్కడికక్కడే దరఖాస్తుల స్వీకరణ జరుగుతోంది. ప్రాథమికంగా అర్హత సాధించిన యువతకు 90 రోజులు శిక్షణ ఇచ్చేందుకు ప్రణాళికలు రూపొందిస్తున్నారు. హోంశాఖ పరిధిలోని ఉద్యోగాలకు దేహదారుఢ్యం అవశ్యం కావడంతో జిల్లాల్లోని పోలీస్‌ శిక్షణ కేంద్రాల మైదానాలను సిద్ధం చేస్తున్నారు. ప్రత్యేక రాష్ట్రం ఆవిర్భవించాక హోంశాఖ ఆధ్వర్యంలో 2015లో 9281, 2018లో 18,143 పోస్టులకు నోటిఫికేషన్‌ వెలువడగా.. ఈసారి అంతకన్నా ఎక్కువగా 18,334 పోస్టులను భర్తీ చేయనున్నారు. గతంలో మాదిరిగానే యువతకు ఉచిత శిక్షణ శిబిరాల్ని ఏర్పాటు చేయాలని డీజీపీ ఎం.మహేందర్‌రెడ్డి ఇప్పటికే అన్ని యూనిట్ల పోలీస్‌ ఉన్నతాధికారులకు ఆదేశాలిచ్చారు. దీంతో ఆసక్తిగల యువత నుంచి ఆన్‌లైన్‌లో దరఖాస్తుల నమోదు ప్రక్రియ మొదలైంది. కిందటిసారి హోంశాఖలో కొలువుల భర్తీ నోటిఫికేషన్‌కు ఏకంగా 6 లక్షలకుపైగా దరఖాస్తులొచ్చాయి. ఈక్రమంలో వీలైనంత ఎక్కువమందికి పోలీస్‌శాఖ తరఫున శిక్షణ ఇవ్వాలని నిర్ణయించారు.
మహిళల వసతిపై దృష్టి :మొత్తం పోస్టుల్లో 95 శాతానికి పైగా కానిస్టేబుల్‌ కొలువులే. కొత్త జోనల్‌ వ్యవస్థ అమలులోకి వచ్చాక ఈఉద్యోగాల భర్తీ ఇదే తొలిసారి. ఈ వ్యవస్థలో కానిస్టేబుల్‌ పోస్టులన్నీ జిల్లా కేడర్‌కు చెందినవే కావడంతో యూనిట్ల వారీగా పోటాపోటీగా శిక్షణ ఇచ్చేందుకు సిద్ధమవుతున్నారు. ఈసారి మహిళా ఆశావహుల సంఖ్య ఎక్కువగా ఉంటుందని అంచనా వేస్తున్నారు. వారికి సురక్షితమైన వసతి ఏర్పాట్లపై దృష్టి సారిస్తున్నారు. ‘‘శిక్షణకు వచ్చే మహిళలకు భద్రతతో కూడిన వసతి ఉంటుంది. ఎక్కువగా డీటీసీల్లోనే శిక్షణ ఇస్తారు కాబట్టి సురక్షిత వాతావరణం ఉంటుంది’’ అని నల్గొండ ఎస్పీ రెమా రాజేశ్వరి తెలిపారు.