భాజపాలో చేరనున్న మాజీమంత్రి మోత్కుపల్లి

మాజీ మంత్రి మోత్కుపల్లి నరసింహులు కాషాయ కండువా కప్పుకోనున్నారు. కేంద్ర మంత్రి కిషన్​రెడ్డి, భాజపా రాష్ట్ర అధ్యక్షుడు లక్ష్మణ్ మోత్కుపల్లి ఇంటికి వెళ్లి పార్టీలోకి రావాలని ఆహ్వానించారు. భాజపాలో చేరేందుకు ఆయన సానుకూలంగా స్పందించినట్లు సమాచారం.

భాజపాలోకి వలసల పరంపర కొనసాగుతోంది. మాజీ ఎంపీ వివేక్​ కాషాయతీర్థం పుచ్చుకుని రెండ్రోజులు కూడా గడవకముందే మరో అగ్రనేత కాషాయ కండువ కప్పుకోనున్నట్లు తెలుస్తోంది. మాజీ మంత్రి మోత్కుపల్లి నరసింహులు ఇంటికి వెళ్లి కేంద్ర మంత్రి కిషన్​రెడ్డి, భాజపా రాష్ట్ర అధ్యక్షుడు లక్ష్మణ్​ పార్టీలో చేరాలని ఆహ్వానించారు. రెండు గంటల పాటు సుదీర్ఘ చర్చలు జరిపాక మోత్కుపల్లి సానుకూలంగా స్పందించినట్లు సమాచారం. దిల్లీలో కమలదళపతి అమిత్​ షా సమక్షంలో పార్టీలో చేరతారని రాష్ట్ర నేతలు తెలిపారు. ఈనెల 18న జాతీయ కార్యనిర్వాహక అధ్యక్షుడు జేపీ నడ్డా రాష్ట్రానికి రానున్నారని ఆయన సమక్షంలో తెదేపాకు చెందిన ముఖ్యనేతలు కమలతీర్థం పుచ్చుకోనున్నారని లక్ష్మణ్ వెల్లడించారు.

• ఇదీ చూడండి : కర్ణాటక: ప్రాణాల కోసం సాహసం చేయాల్సిందే.!