రూ.5 కోట్లతో కపిరాజుల పార్క్ నిరిస్తోన్న ప్రభుత్వం

కోతుల నుంచి కాపాడండి మొర్రో.. అని వేడుకున్నారు ప్రజలు. స్పందించిన కర్ణాటక ప్రభుత్వం రూ. 5 కోట్లు ఖర్చు చేసి కపిరాజులకు ప్రత్యేక పార్కు కట్టేసింది. ఫలితంగా ప్రజలకు వానరాల నుంచి విముక్తి కలిగించింది.

అడవులు నరికేసి మనం ఇళ్లు కట్టుకుంటున్నాం. వీటి మూలానా అడవిలోని జంతువులకు ఆహార కొరత ఏర్పడింది. అన్ని జంతువులు ఎలాగోలా సర్దుకుంటున్నాయి కానీ, వానరాలు మాత్రం మానవాళిని ముప్పుతిప్పలు పెడుతున్నాయి. పొలాల్లో పడి పంటలను నాశనం చేస్తున్నాయి. అంతే కాదు, ఇళ్లల్లోకి దౌర్జన్యంగా చొరబడి.. వాటికి నచ్చిన ఆహారాన్ని గిన్నెలు, డబ్బాలతో సహా ఎత్తుకెళతాయి. అడ్డొస్తే ఇకిలించి భయపెడతాయి. ఇంకా ఎక్కువ చేస్తే మనుషులని కూడా చూడకుండా రక్కేస్తాయి. అందుకే, కోతుల అరాచకాలను భరించలేక కర్ణాట​క ప్రభుత్వం.. వాటి కోసం ప్రత్యేక పార్కు ఏర్పాటు చేసింది.

కోతుల పోరు తాళలేక...

శివమొగ్గ జిల్లా, మలెనాడ్​ ప్రజలు కోతుల పోరు తగ్గించమని ప్రభుత్వాన్ని కోరారు. ప్రభుత్వం ఈ సమస్యకు పరిష్కారం ఆలోచించింది. వాటికి ఆహారం దొరకకే ఇళ్లపైకి, పంటల్లోకి వస్తున్నాయి. అదే ఆహారం వాటికి సరిపడా దొరికితే.. వాటి మానాన అవి గడుపుతాయి అనుకుంది. అందుకే, కపిరాజుల కోసం రూ. 5 కోట్లు ఖర్చు పెట్టి ప్రత్యేక పార్కు నిర్మించింది.

కపిరాజుల పార్క్​...

కోతులు ఆహారం కోసం కష్టపడాల్సిన పని లేకుండా.. వాటిని తీసుకొచ్చి ఈ పార్కులో పెడతారు. ఇక్కడుండే బోలెడన్ని చెట్ల ఫలాలు, నిర్వాహకులు పెట్టే ఆహారంతో కడుపు నింపుకుంటాయి. అయితే, ఓ చోట పెట్టినంత మాత్రాన కోతులను కట్టడి చేయలేమని తెలిసే... హోసానగర్ తాలూకా, నిట్టూరు గ్రామంలో శరవతి నది పక్కన ఈ పార్కు నిర్మించారు. మూడు పక్కలా నీరు ఉంటుంది కాబట్టి ఆ నీటిని దాటి కోతులు జనావాసాల్లోకి వెళ్లలేవు. ఈ విధంగా కోతుల సమస్యకు చెక్​ పెట్టొచ్చు అంటున్నారు.

దేశంలో అసోం, హిమాచల్​ ప్రదేశ్​లలోనూ ఇలాగే జనంతో పోరాడి.. ప్రభుత్వాలతో పార్కు కట్టించుకున్నాయి కోతులు! ఇప్పుడు కర్ణాటక శివమొగ్గలో ఈ మూడో అతిపెద్ద కోతుల పార్కు ఏర్పాటైంది. భవిష్యత్తులో ఈ పార్కు పర్యటక ప్రదేశంగా మారనుంది. ప్రస్తుతం వానర పార్కు నిర్మాణం పూర్తయింది.. త్వరలో ప్రారంభంకానుంది.

ఇవీ చూడండి : '3టీ వ్యూహంతోనే వైరస్​పై విజయం'