JNTUH Fee Issue : జేఎన్టీయూహెచ్ వరుసగా రెండో ఏడాది బీటెక్ ఫీజులను భారీగా పెంచేసింది. గతేడాదే రెగ్యులర్ బీటెక్ ఫీజును రూ.18 వేల నుంచి రూ.35 వేలకు పెంచిన వర్సిటీ ప్రస్తుత విద్యాసంవత్సరంలో దాన్ని రూ.50 వేలకు పెంచడం గమనార్హం. సెల్ఫ్ ఫైనాన్స్ కోర్సుల ఫీజును గతేడాది రూ.35 వేల నుంచి రూ.70 వేలకు పెంచగా ఇప్పుడు రూ.లక్షకు పెంచారు.
ఫీజుల పెంపుపై ఎలాంటి ప్రకటన చేయకుండా గుట్టుగా ఉంచడం గమనార్హం. జేఎన్టీయూహెచ్ హైదరాబాద్‌ ప్రాంగణంతోపాటు జగిత్యాల, మంథని, సుల్తాన్‌పూర్‌, సిరిసిల్ల, ఈ ఏడాది ప్రారంభమవుతున్న వనపర్తి కళాశాలల్లో చేరే విద్యార్థులకు ఈ ఫీజులు వర్తిస్తాయి. వాస్తవానికి 10 వేల లోపు ర్యాంకర్లకే వర్సిటీ కళాశాలల్లో సీట్లు వస్తుంటాయి. వారి పూర్తి బోధన రుసుము ప్రభుత్వమే చెల్లిస్తుంది.