ఆంధ్రప్రదేశ్ విశాఖ జిల్లా హుకుంపేట మండలం రాపపంచాయతీ ఈదులగరువులో గెమ్మెలి ఆంబే బాంబే అనే మహిళకు జ్వరం వచ్చింది. చాలా రోజులు అవుతున్నా.. జ్వరం తగ్గడం లేదు. అంబులెన్స్లో పాడేరు జిల్లా ఆస్పత్రికి ఆమెను తీసుకెళ్లారు. ఐదు రోజులైంది అయినా మార్పు లేదు. పరీక్షల్లో రోగం గురించి తెలియలేదు. రోజురోజుకీ ఆమె నీరసించిపోతోందని.. దెయ్యం పట్టినట్టు ఉంటుందని కుటుంబసభ్యులు అనుమానించారు.
ఆస్పత్రిలో భూతవైద్యం
ఏజెన్సీ కొండల్లో పూజలు చేసే మంత్రసానిని ఏకంగా ఆస్పత్రికే తీసుకొచ్చారు. ఆ వార్డులో అందరూ చూస్తుండగానే.. ఆ భూత వైద్యురాలు రోగి నాడి పట్టుకుని మంత్రాలు చదివేసింది. తోటి రోగులు అందరూ చూస్తుండగానే భూత వైద్యం పూర్తి చేసింది. మహిళకు శాంతి శాంతి అంటూ సపర్యలు చేసింది. ఇదంతా... ఎదురుగా మందుల కౌంటర్లో నర్సులు చూస్తూనే ఉన్నారు. అదే సమయంలో పురుషుల వార్డులో... వైద్యులు రోగులను పరీక్షిస్తున్నారు. ఆ భూత వైద్యురాలు.. బాధితురాలికి వైద్యం చేస్తూనే ఉంది.
పాడేరు ఏజెన్సీ పెద్దాస్పత్రిలో ఇలాంటి వాతావరణం విస్తుపోయేలా చేసింది. ఆధునిక కాలంలో ఇంకా ఇలాంటి తీరును ప్రజలు నమ్ముతుండడం.. కొందరిని ఆశ్చర్యపరిచింది. అంతేకాకుండా భూతవైద్యంతో బాగుపడతామని బాధితురాలి కుటుంబీకులు చెప్పడం.. తన వైద్యంతో బాధితురాలికి నయం అవుతుందని.. ఆ భూత వైద్యురాలు సైతం చెప్పడం.. ఆ ప్రాంతంలోని ప్రజల మానసిక స్థితిని తెలియజేస్తోంది.
ఐదు రోజుల నుంచి జ్వరం వస్తోంది. పరీక్షల్లో ఏం తెలియడం లేదు. చలి జ్వరం తగ్గడం లేదు. ఎన్ని రోజులున్నా ఫలితం లేదు. అయితే దెయ్యం లాంటిది పట్టిందని అనుకుంటున్నాం. దానికి పండు, ఫలాలు పెడితే తగ్గుతుందని నమ్ముతున్నాం. గతంలో ఇలా చేస్తే తగ్గింది.
-బాధితురాలి బంధువు