Tirupati Arch Collapse: డ్రైవర్ నిర్లక్ష్యం కారణంగా కూలిన తితిదే స్వాగత తోరణం

లారీ డ్రైవర్ నిర్లక్ష్యం కారణంగా తిరుపతిలో తితిదే స్వాగత తోరణం (Tirupati Arch collapse) కూలింది. నగరికి చెందిన ఓ లారీ.. ఆర్టీసీ బస్టాండ్ నుంచి రామానుజకూడలి వెళ్లే ప్రధాన రహదారిపై ప్రయాణిస్తోంది.

లారీ డ్రైవర్ నిర్లక్ష్యం కారణంగా తిరుపతిలో తితిదే స్వాగత తోరణం (Tirupati Arch collapse) కూలింది. నగరికి చెందిన ఓ లారీ.. ఆర్టీసీ బస్టాండ్ నుంచి రామానుజకూడలి వెళ్లే ప్రధాన రహదారిపై ప్రయాణిస్తోంది. టిప్పర్​ వెనక బాడీ అమాంతంగా పైకి లేచిపోయింది. దానిని గమనించిన డ్రైవర్​ అలాగే నడిపించాడు. కొంత దూరం వెళ్లాక దారిలో తితిదే ఏర్పాటు చేసిన హోర్డింగ్​ను బలంగా ఢీకొట్టింది. దీంతో స్వాగత తోరణం కుప్పకూలిపోయింది. రహదారిపై ఎదురుగా వస్తున్న ఓ భక్తుడి కారుపై కూలిన తోరణం పడిపోయింది. అయితే కారులోని భక్తులకు ఏమీ కాకపోవడంతో అందరూ ఊపిరి పీల్చుకున్నారు.

రోడ్డుకు ఇరువైపులా హోర్డింగ్ పడిపోవడంతో బస్టాండ్​కు బస్సుల రాకపోకలకు ఇబ్బంది ఏర్పడింది. సుమారు మూడు గంటలపాటు ట్రాఫిక్​కు అంతరాయం కలిగింది. దీంతో భక్తులు, ప్రయాణికులు తీవ్ర ఇబ్బందులు ఎదుర్కొన్నారు. వెంటనే స్పందించిన పోలీసులు.. శ్రీనివాస సేతు నిర్మాణ సంస్థ ఆఫ్కాన్ సహకారంతో హోర్డింగ్ తొలగించి..పరిస్థితిని చక్కదిద్దారు.

ఇదీ చదవండి : తిరుమలలో వైభవంగా అనంతపద్మనాభస్వామి వ్రతం