శంషాబాద్‌ విమానాశ్రయంలో గల్ఫ్‌కు వెళ్తున్న వారిపై నిఘా పెరగడం వల్ల అక్రమార్కులు రూట్ మార్చినట్లు డీఆర్ఐ అధికారులు గుర్తించారు. ఈనెల 21న సికింద్రాబాద్ వెస్ట్ మారేడ్పల్లిలో ఓ ఆస్పత్రి వద్ద రూ. 2 కోట్లు విలువైన బంగారం బిస్కెట్లు, మరో రెండు కోట్ల నగదును అధికారులు స్వాధీనం చేసుకున్నారు. బంగారం ఎవరిది.. స్మగ్లర్లు ఎవరు అనే కోణంలో దర్యాప్తు చేస్తున్నారు. మరింత సమాచారం కోసం నిందితుల చరవాణులను విశ్లేషిస్తున్నారు.
ఎలా పట్టుబడ్డారు..
అక్రమార్కుల కదలికలపై డీఆర్ఐ అధికారులకు పక్కా సమాచారం అందింది. వాహనాలు పార్కింగ్ చేసిన స్థలం, కార్ల రంగు, నంబర్లు సహా నగదు, బంగారం ఎక్కడ దాచారో వంటి సమాచారంతో అధికారులు సోదాలు చేశారు. పోలీసులకు చిక్కకుండా అక్రమార్కులు సైతం పక్కా ప్రణాళికలు రచించారు. కారులోని హ్యాండ్ బ్రేక్ వద్ద ప్రత్యేకంగా ఏర్పాటు చేసిన పెట్టెలో బంగారం దాచారు. అక్రమ సొమ్ము తరలించే సమయంలో ఎక్కడైనా తనిఖీలు జరగవచ్చనే అనుమానంతో ఇలాంటి ఏర్పాట్లు చేశారు. ముందుస్తు సమాచారంతో అధికారులు బంగారం, నగదు స్వాధీనం చేసుకొని, నిందితులను అరెస్ట్ చేశారు.
దర్యాప్తు ఎలా సాగుతోంది..
స్వాధీనం చేసుకున్న నగదును పలు బ్యాంకుల నుంచి విత్డ్రా చేసినట్లుగా డీఆర్ఐ అధికారులు గుర్తించారు. అంత పెద్ద మొత్తంలో సొమ్మును ఎవరు డ్రా చేశారో తెలుసుకుంటున్నారు. ఆయా ఖాతాదారుల వివరాలను సేకరిస్తున్నారు. ఈ కోణంలో దర్యాప్తు చేస్తే ఎవరు బంగారం కొనుగోలు చేశారో తెలిసే అవకాశం ఉంటుందని.. వారి ద్వారా స్మగ్లర్ల వివరాలు తెలుసుకోవాలని డీఆర్ఐ అధికారులు భావిస్తున్నారు. అరెస్ట్ చేసిన వారు ముగ్గురు హైదరాబాద్కు చెందిన వారే కావడం వల్ల వారి నుంచి స్వాధీనం చేసుకున్న చరవాణిల డేటాను విశ్లేషిస్తున్నారు.
హైదరాబాద్కు చెందిన స్మగ్లర్లు ఎవరనే కోణంలోనే..
స్వాధీనం చేసుకున్న బంగారం బిస్కెట్లపై దుబాయి అనే పేరు ముద్రించి ఉంది. గల్ఫ్ దేశాల నుంచి తీసుకొచ్చినట్లు అధికారులు గుర్తించారు. ముంబయి ఎయిర్పోర్టు నుంచి మైసూరు మీదుగా హైదరాబాద్ తీసుకొచ్చినట్లు నిందితులు చెప్పినట్లు సమాచారం. నిందితులు నుంచి కొంత సమాచారాన్ని రాబట్టినా.. పూర్తిస్థాయిలో విచారించి హైదరాబాద్కు చెందిన స్మగ్లర్లను గుర్తించేందుకు అవకాశం ఉంటుందని డీఆర్ఐ అధికారులు చెబుతున్నారు.
బంగారం ఎవరిది.. స్మగ్లర్లు ఎవరు? ఇవీచూడండి: పార్కింగ్ చేసిన కారులో 4 కిలోల బంగారం, నగదు
