'కాళేశ్వరం, సీతారామ, మిషన్ భగీరథపై సీబీఐ విచారణ జరపాలి'

లోక్​సభ సమావేశాల్లో లేవనెత్తాల్సిన అంశాలపై చర్చించినట్లు టీ పీసీసీ అధ్యక్షుడు ఉత్తమ్​కుమార్​రెడ్డి వెల్లడించారు. కాళేశ్వరం, సీతారామ ప్రాజెక్టు, మిషన్ భగీరథపై సీబీఐ విచారణకు డిమాండ్​ చేస్తామన్నారు.

పార్లమెంట్ సమావేశాల్లో ఏఏ అంశాలు లేవనెత్తాలనే దానిపై చర్చించామని టీ పీసీసీ అధ్యక్షుడు ఉత్తమ్​కుమార్​రెడ్డి వెల్లడించారు. గాంధీభవన్‌లో జరిగిన భేటీకి ఉత్తమ్​ సహా ఎంపీలు రేవంత్‌రెడ్డి, కోమటిరెడ్డి, సీఎల్పీ నేత భట్టి విక్రమార్క, ఎమ్మెల్యే జగ్గారెడ్డి, కుసుమకుమార్, మధు యాష్కీ, చిన్నారెడ్డి, మల్లు రవి, దాసోజు శ్రవణ్‌, నాగం జనార్దన్​రెడ్డి పాల్గొన్నారు.

రాష్ట్రంలో ప్రాజెక్టుల పేరుతో కేసీఆర్ చేస్తున్న దోపిడీపై పార్లమెంట్​లో చర్చిస్తాం. కాళేశ్వరం, సీతారామ ప్రాజెక్టు, మిషన్ భగీరథపై సీబీఐ విచారణకు డిమాండ్​ చేస్తాం. కేంద్ర పెద్దలతో సహా దర్యాప్తు సంస్థలకు ఫిర్యాదులు చేస్తాం. నల్లమలలో యురేనియం తవ్వకాలపైనా ప్రస్తావిస్తాం. హైదరాబాద్ నుంచి విజయవాడకు బులెట్ ట్రైన్ వేయాలని డిమాండ్ చేస్తాం. విభజన హామీలైన కాజీపేట కోచ్​ ఫ్యాక్టరీ, గిరిజన విశ్వవిద్యాలయం, బయ్యారం ఉక్కు కర్మాగారం వంటి పెండింగ్ అంశాలను లోక్​సభలో ప్రస్తావిస్తాం. గిరిజన యూనివర్శిటీకి కేవలం రూ.10 లక్షలే కేటాయించారు. ఇంత కంటే దారుణం ఉంటుందా.. భువనగిరి ఆస్పత్రిని ఎయిమ్స్​గా ఆదునికీకరించాలి. దీనిపైనా పార్లమెంట్​లో ప్రస్తావిస్తాం.

- ఉత్తమ్​కుమార్​ రెడ్డి, పీసీసీ అధ్యక్షుడు

భాజపా రాష్ట్ర అధ్యక్షుడు బండి సంజయ్​.. కేసీఆర్​ అవినీతిపై మాట్లాడుతారని.. మరేందుకు కేంద్రానికి ఫిర్యాదుచేయలేదని నిలదీశారు. భాజపా, తెరాస చీకటి ఒప్పందం చేసుకున్నాయని ఉత్తమ్​ ఆరోపించారు.

ఆర్థికంగా వెనకబడిన వర్గాలకు 10 శాతం రిజర్వేషన్లు ఇస్తుంటే.. దళితులు, గిరిజనులు, మైనార్టీలకు ఎందుకు 12 శాతం రిజర్వేషన్లు ఇవ్వడం లేదని ఉత్తమ్​కుమార్​రెడ్డి ప్రశ్నించారు. పసుపు బోర్డు, ధాన్యం కొనుగోలు కేంద్రాల ఎత్తివేతపైనా లోక్​సభలో నిలదీస్తామని స్పష్టం చేశారు. సమ్మక్క సారక్క జాతరను జాతీయ పండుగగా గుర్తించాలని ఉత్తమ్​ డిమాండ్​ చేశారు.

కేసీఆర్​ను జైలుకు పంపుతామంటున్న బండి సంజయ్​... ఎందుకు సీబీఐ విచారణకు ఆదేశించేలా కేంద్రంపైన ఎందుకు ఒత్తిడి చేయడం లేదని భువనగిరి ఎంపీ కోమటిరెడ్డి వెంకటరెడ్డి ప్రశ్నించారు. ప్రభుత్వ అవినీతిపై కేంద్ర దర్యాప్తు సంస్థలతో విచారణ జరిపించేంతవరకు కాంగ్రెస్​ పోరాటం చేస్తుందని సంగారెడ్డి ఎమ్మెల్యే జగ్గారెడ్డి అన్నారు.

ఇవీచూడండి:కొత్త సచివాలయ నిర్మాణ పనుల్లో వేగం పెంచాలి: సీఎం కేసీఆర్