Deputy speaker: 'త్వరగా డబుల్ బెడ్​రూం ఇళ్లను ప్రారంభించండి'

సికింద్రాబాద్ నియోజకవర్గం పరిధిలోని పలు ప్రాంతాల్లో డబుల్ బెడ్​రూం ఇళ్లను త్వరగా ప్రారంభించాలని ఉప సభాపతి పద్మారావు గౌడ్ అధికారులను ఆదేశించారు. పేద ప్రజలకు అద్దె ఇళ్లలో నివసించాల్సిన పరిస్థితిని వెంటనే తప్పించాలని సూచించారు.

సికింద్రాబాద్ నియోజకవర్గం పరిధిలోని సుభాష్ చంద్రబోస్ నగర్ (సీతాఫల్​మండీ), దోబీ ఘాట్ (మెట్టుగూడ) డివిజన్లలో చేపట్టిన డబుల్ బెడ్​రూం ఇళ్ల ప్రారంభోత్సవ కార్యక్రమాన్ని ప్రారంభించాలని ఉప సభాపతి పద్మారావు గౌడ్ అధికారులను ఆదేశించారు. జులై తొలి వారంలో ఈ కార్యక్రమాన్ని చేపట్టేందుకు అధికారులు ఏర్పాట్లు చేయాలని సూచించారు. రెండు పడకల ఇళ్ల నిర్మాణంపై సీతాఫల్​మండీలోని తన క్యాంపు కార్యాలయంలో అధికారులతో సమీక్ష నిర్వహించారు.

రూ. 26 కోట్ల ఖర్చుతో సుభాష్ చంద్రబోస్ నగర్​లో 60, దోబీ ఘాట్​లో 207 ఇళ్లను నిర్మించినట్లు పద్మారావు గౌడ్ తెలిపారు. పేద ప్రజలు అద్దె ఇళ్లలో నివసించాల్సిన పరిస్థితిని తప్పించాలని.. వెంటనే ప్రారంభోత్సవాలు నిర్వహించాలని సూచించారు. ఇళ్ల ప్రారంభోత్సవానికి వీలైనంత త్వరలో ఏర్పాట్లు జరుపుతామని అధికారులు పేర్కొన్నారు. ఈ సమీక్షలో తహసీల్దార్ సునీల్ నహటా, కార్పొరేటర్లు కుమారి సామల హేమ, శ్రీమతి రాసురి సునీత, తదితరులు పాల్గొన్నారు.

ఇదీ చూడండి: CM KCR: కలెక్టర్ల అనుమతి లేకుండా కొత్త లేఅవుట్లు అనుమతించవద్దు: సీఎం