'సికింద్రాబాద్ నియోజకవర్గంలో తెరాస తన సత్తా చాటింది'

త్వరలో ప్రారంభించనున్న సికింద్రాబాద్ ఎమ్మెల్యే క్యాంపు కార్యాలయంలో.. నియోజకవర్గంలోని అన్ని డివిజన్ల కార్పొరేటర్ల కార్యాలయాలను ఏర్పాటు చేస్తామని ఉప సభాపతి తీగుళ్ల పద్మారావు గౌడ్ అన్నారు. ప్రజలకు నిత్యం అందుబాటులో ఉంటూ మంచి పేరు తెచ్చుకోవాలని కార్పొరేటర్లకు సూచించారు. సీతాఫల్​మండిలో డిప్యూటీ మేయర్ మోతె శ్రీలతకి నిర్వహించిన సన్మాన కార్యక్రమంలో తీగుళ్ల పాల్గొన్నారు.

సికింద్రాబాద్ నియోజకవర్గంలో తెరాస తన సత్తాను నిరూపించుకుందని ఉప సభాపతి తీగుళ్ల పద్మారావు గౌడ్ అన్నారు. మున్సిపల్ ఎన్నికల్లో నియోజకవర్గంలోని ఐదు డివిజన్లను కైవసం చేసుకుందన్నారు. తార్నాక డివిజన్ కార్పొరేటర్ మోతె శ్రీలత శోభన్ రెడ్డికి హైదరాబాద్ డిప్యూటీ మేయర్ పదవి లభించిన సందర్భంగా.. సీతాఫల్​మండిలో సన్మాన కార్యక్రమం జరిగింది.

మంచి పేరు తెచ్చుకోవాలి:

"శ్రీలతకి డిప్యూటీ మేయర్ పదవి దక్కడం ఆనందంగా ఉంది. త్వరలోనే సీతాఫల్​మండిలో నూతనంగా సికింద్రాబాద్ ఎమ్మెల్యే క్యాంపు కార్యాలయాన్ని ప్రారంభించనున్నాం. నియోజకవర్గానికి చెందిన అన్ని డివిజన్ల కార్పొరేటర్ల కార్యాలయాలను ఈ ప్రాంగణంలోనే ఏర్పాటు చేస్తాం. డిప్యూటీ మేయర్​తో సహా కార్పొరేటర్లు ప్రతి రోజు కొంత సమయం ఖచ్చితంగా ప్రజలకు ఈ కార్యాలయం ద్వారానే అందుబాటులో ఉంటారు. నిత్యం ప్రజల్లో ఉంటూ కార్పొరేటర్లు మంచి పేరు తెచ్చుకోవాలి. మోతె శ్రీలత రెడ్డికి డిప్యూటీ మేయర్ పదవిని కల్పించినందుకు సీఎం కేసీఆర్, వర్కింగ్ ప్రెసిడెంట్ కేటీఆర్​కు కృతఙ్ఞతలు. "

-తీగుళ్ల పద్మారావు గౌడ్, ఉప సభాపతి ​

కార్యక్రమంలో కార్పొరేటర్లు కుమారి సామల హేమ, కంది శైలజ, రాసురి సునిత, లింగాని ప్రసన్న, తదితరులు పాల్గొన్నారు.

ఇదీ చూడండి:సగిలేరు వాగులో పడి ముగ్గురు బాలికలు మృతి