కరోనా వేళ కేంద్రం కోత.. రాష్ట్రాన్ని నడిపేదెట్టా?

కేంద్రం నుంచి వచ్చే పన్నుల వాటాలో భారీ కోత పడింది. ఏప్రిల్ నెలకు గాను రాష్ట్రానికి 1,393 కోట్ల రూపాయలు రావాల్సి ఉండగా... కేవలం 982 కోట్లే వచ్చాయి. ఏకంగా 29.5 శాతం నిధులు తగ్గాయి. లాక్‌డౌన్‌ కారణంగా రాబడులు పడిపోయి అసలే ఆర్థిక ఇబ్బందులు ఎదుర్కొంటున్న రాష్ట్ర ప్రభుత్వానికి ఇది చాలా ఇబ్బందికర పరిణామం. మార్చి నెలలో వచ్చిన ఆదాయంతో ఇప్పటి వరకు గట్టెక్కిన రాష్ట్ర ప్రభుత్వానికి ఇక నుంచి ఆర్థిక నిర్వహణ కత్తిమీద సాములా మారనుంది.

ప్రస్తుత ఆర్థిక సంవత్సరంలో కేంద్ర పన్నుల్లో రాష్ట్రాల వాటాను కేంద్ర ఆర్థికశాఖ విడుదల చేసింది. 15వ ఆర్థిక సంఘం సిఫారసులకు అనుగుణంగా రాష్ట్రాలకు రూ.46, 038 కోట్లు విడుదల చేసిన కేంద్రం... తెలంగాణ వాటాగా రూ.982 కోట్లు ఇచ్చింది. దీంతో రాష్ట్రానికి రావాల్సిన నిధుల్లో భారీగా కోత పడింది. కేంద్ర బడ్జెట్‌లో పేర్కొన్న ప్రకారం 15వ ఆర్థిక సంఘం నివేదిక ఆధారంగా రాష్ట్రాలకు కేంద్ర పన్నుల్లో వాటాగా ఏప్రిల్ నెలకు రూ.65, 348 కోట్లు ఇవ్వాల్సి ఉంది. అయితే కేంద్రం ఆ పరిమాణాన్ని రూ.46, 038 కోట్లకు కుదించింది.

భారీగా తగ్గిన నిధులు

అన్ని రాష్ట్రాలకు రావాల్సిన నిధుల పరిమాణంపైనా ఆ ప్రభావం పడింది. ఆయా రాష్ట్రాలకు ఏప్రిల్ నెలకు గాను కేంద్ర పన్నుల్లో వాటాగా రావాల్సిన నిధులు భారీగా తగ్గాయి. వాస్తవంగా రాష్ట్రానికి ఏప్రిల్ నెలకు గాను కేంద్ర పన్నుల్లో వాటాగా 1,393 కోట్ల రూపాయలు రావాల్సి ఉంది. మొత్తం పరిమాణం రూ.19,310 కోట్లు తగ్గినందున రాష్ట్రానికి రావాల్సిన నిధుల్లోనూ రూ.411 కోట్ల రూపాయలు తగ్గి.. రూ. 982కోట్లు మాత్రమే వచ్చాయి. రాష్ట్ర వాటా అయిన రూ.1,393 కోట్లలో 29.5శాతం నిధులు తగ్గాయి. ఆంధ్రప్రదేశ్​కు రూ.2,686కోట్లు రావాల్సి ఉండగా... రూ.1,892కోట్లు వచ్చాయి. లాక్‌డౌన్‌ కారణంగా తీవ్ర ఆర్థిక ఇబ్బందులు ఎదుర్కొంటున్న రాష్ట్రాలకు ఈ పరిణామం సంకటంగా మారింది.

కరోనా కట్టడి చర్యల్లో భాగంగా లాక్‌డౌన్‌ అమలవుతున్నందున రాష్ట్రాల ఆదాయం భారీగా పడిపోయింది. నెలకు రూ. 15 వేల కోట్ల వరకు రావాల్సి ఉండగా... రూ. 150 కోట్లు కూడా రావడం లేదని ముఖ్యమంత్రి కేసీఆర్​ స్వయంగా ప్రకటించారు. ఈ పరిస్థితుల్లో రుణపరిమితి సడలింపు సహా ఇతరత్రా ఆర్థికపరమైన తోడ్పాటు, వెసులుబాటు కల్పించాలని సీఎం ఇప్పటికే ప్రధానిని కోరారు. అదనపు ఆర్థిక తోడ్పాటు వస్తుందని ఆశిస్తే... రాష్ట్ర వాటాగా రావాల్సిన నిధుల్లో కోత పడడం సంకట పరిస్థితుల్లోకి నెట్టిందని చెప్పుకోవచ్చు.

రాష్ట్రంలో మార్చి 22 నుంచి లాక్‌డౌన్‌ అమల్లో ఉంది. అప్పటి వరకు రాష్ట్ర ఖజానాకు నిధులు బాగానే వచ్చాయి. ఏప్రిల్ నెల అవసరాల కోసం రాష్ట్ర ప్రభుత్వం అవసరమైన సర్దుబాటు చేస్తూ వచ్చింది. కానీ ఏప్రిల్ నెలలో కనీస ఆదాయం కూడా లేదు. దీనికి తోడు కోవిడ్-19 చికిత్స, పరీక్షలకు వ్యయం, నిరుపేదలు, వలస కూలీలకు బియ్యం, నగదు కోసం అదనపు భారం పడనుంది. కేంద్ర పన్నుల్లో రాష్ట్ర వాటాలో రావాల్సిన నిధుల కంటే తక్కువ నిధులు వచ్చిన విషయాన్ని అధికారులు ముఖ్యమంత్రి దృష్టికి తీసుకెళ్లారు. ఆర్థిక పరిస్థితులు సీఎంకు వివరించారు. కేంద్రం నుంచి రావాల్సిన నిధులు కూడా తగ్గినందున ఎలా నెట్టుకొస్తారన్నది చూడాలి.

ఇదీ చదవండి:తలసేమియా రోగులకు రక్తమార్పిడి చేస్తేనే బతుకుతారు: మంత్రి