మీ ప్లాట్లు రిజిస్టర్‌ చేసుకోండి.. అమరావతి రైతులకు సీఆర్‌డీఏ అధికారుల ఫోన్లు

16:51 March 08

మీ ప్లాట్లు రిజిస్టర్‌ చేసుకోండి.. అమరావతి రైతులకు సీఆర్‌డీఏ అధికారుల ఫోన్లు

ఏపీ రాజధాని నిర్మాణంపై ఆ రాష్ట్ర హైకోర్టు ఇచ్చిన తీర్పుతో సీఆర్‌డీఏ అధికారుల్లో కొంత కదలిక వచ్చింది. నెల రోజుల్లో మౌలిక సదుపాయాలు కల్పించాలని, ప్లాట్లను అభివృద్ధి చేసి రైతులకు 3 నెలల్లో అప్పగించాలని న్యాయస్థానం తన తీర్పులో స్పష్టం చేసింది. ఈ నేపథ్యంలో ప్రభుత్వం ప్లాట్ల రిజిస్ట్రేషన్‌ ప్రక్రియను వేగవంతం చేసింది. ఉత్తర్‌ప్రదేశ్‌ ఎన్నికల పరిశీలకురాలిగా సీఆర్‌డీఏ కమిషనర్‌ విజయకృష్ణన్‌ వెళ్లారు. ఆమె ఈ నెల 14న విధుల్లో చేరనున్నారు. దీంతో పురపాలకశాఖ ప్రత్యేక ప్రధాన కార్యదర్శి ఈ వ్యవహారాన్ని పర్యవేక్షిస్తున్నారు. స్వయంగా సీఆర్‌డీఏ కార్యాలయానికి వచ్చి అధికారులతో సమావేశాలు నిర్వహిస్తున్నారు. రిజిస్ట్రేషన్‌ ప్రక్రియను ఈ నెలలో పూర్తి చేయనున్నారు.

రిజిస్ట్రేషన్‌ చేయాల్సిన ప్లాట్లు 24,357..

రాజధాని నిర్మాణం కోసం గత ప్రభుత్వం 28,587 మంది రైతుల నుంచి 34,385 ఎకరాలను సమీకరించింది. దీనికి గానూ వారికి నివాస, వాణిజ్య ప్లాట్లను అభివృద్ధి చేసి ఇవ్వాలన్నది ఒప్పందం. ఈ మేరకు భూ యజమానులకు మొత్తం 64,735 ప్లాట్లను కేటాయించింది. ఇందులో 38,282 నివాస, 26,453.. వాణిజ్య ప్లాట్లు ఉన్నాయి. వీటిల్లో గత ప్రభుత్వ హయాంలో 40,378 ప్లాట్లను రైతుల పేరిట రిజిస్ట్రేషన్‌ చేశారు. వైకాపా ప్రభుత్వం వచ్చిన తర్వాత ఈ ప్రక్రియ నిలిచిపోయింది. హైకోర్టు గడువుతో ఎట్టకేలకు కదలిక వచ్చింది. ఇంకా 24,357 ప్లాట్లను వారి పేరిట రిజిస్ట్రేషన్‌ చేయాల్సి ఉంది. ఈ నేపథ్యంలో సోమవారం నుంచి ఈ ప్రక్రియను సీఆర్‌డీఏ అధికారులు తిరిగి ప్రారంభించారు. అధికారులు సంబంధిత రైతులకు ఫోన్లు చేస్తున్నారు. మీకు కేటాయించిన ప్లాట్‌ను రిజిస్ట్రేషన్‌ చేసుకోమని కోరుతున్నారు.