రాష్ట్రంలో కరోనా ఉద్ధృతి తీవ్ర రూపం దాల్చింది. క్రమంగా జిల్లాలకు పాకిన మహమ్మారి అక్కడ వేగంగా ప్రబలుతుండడం ఆందోళన పెంచుతోంది. వరంగల్‌, కరీంనగర్‌, నల్గొండ, నిజామాబాద్‌, మహబూబ్‌నగర్‌, సూర్యాపేట జిల్లాల్లో భారీగా కరోనా కేసులు నమోదవడం ఆందోళన కలిగిస్తోంది. తెలంగాణలో వైరస్ నుంచి ఎవరి నుంచి ఎవరికి వ్యాప్తి చెందుతుందో తెలియని గందరగోళ పరిస్థితులు నెలకొన్నాయి. పరిస్థితి తీవ్రత దృష్ట్యా ఎక్కడికక్కడ కరోనా కట్టడి చేసే దిశగా యుద్ధ ప్రాతిపదికన చర్యలు చేపడుతున్నామని అధికారులు తెలిపారు.
మూడు వారాల వ్యవధిలోనే 50 వేలు..
తెలంగాణలో తొలి కరోనా కేసు మార్చి 2న నమోదుకాగా..... ఏప్రిల్‌ 30 నాటికి కేసులు వెయ్యి దాటాయి. తర్వాత నెల వ్యవధిలో రెట్టింపయ్యాయి. జూన్‌ 1 నుంచి కోవిడ్‌ వ్యాప్తి ఉద్ధృతమవుతోంది. జూన్‌ 30 నాటికి 16,339గా ఉన్న బాధితుల సంఖ్య... మూడు వారాల వ్యవధిలోనే 50 వేలు దాటింది. తెలంగాణలో కరోనా మరణాలు కూడా 447కు పెరిగాయి. మార్చి 29న తొలి మరణం నమోదవ్వగా.. జూన్‌లో 140 మంది, జులైలో ఇప్పటివరకూ 187 మంది మరణించారు.