Fine on Amazon: కొనుగోలు చేసిన వస్తువును డెలివరీ చేయకపోగా.. వసూలు చేసినదాని కన్నా తక్కువ డబ్బు వాపసు చేసి ఇబ్బంది పెట్టినందుకు రూ.10వేలు చెల్లించాలని అమెజాన్‌ సంస్థను హైదరాబాద్‌ వినియోగదారుల కమిషన్‌-2 ఆదేశించింది. గాంధీనగర్‌ బ్యాంక్‌ బరోడా కాలనీకి చెందిన ఎం.శ్రీకాంత్‌.. అమెజాన్‌ నుంచి ఓ చరవాణిని రూ.43,852 వెచ్చించి 2020 జనవరిలో కొనుగోలు చేశారు. చరవాణిని కొనుగోలుదారుడికి చేరవేయలేదు. దీంతో అతనికి కేవలం రూ.41,742 మాత్రమే సంస్థ వాపసు చేసింది. డబ్బులు తగ్గించడంపై సంస్థ సరైన సమాధానం ఇవ్వకపోవడంతో జిల్లా వినియోగదారుల కమిషన్‌ను శ్రీకాంత్‌ ఆశ్రయించారు. సాక్ష్యాధారాలను పరిశీలించిన కమిషన్‌-2 బెంచ్‌.. సేవల్లో లోపంగా పరిగణిస్తూ పరిహారంగా రూ.5వేలు, కేసు ఖర్చులు రూ.5వేలు, 45 రోజుల్లో చెల్లించాలని అమెజాన్‌ సంస్థను ఆదేశించింది.
కొత్త బైక్ ఇవ్వాలని ఆది మోటార్స్‌కు ఆదేశం..:ఉత్పత్తి లోపం ఉన్న ద్విచక్రవాహనం అందించి సేవల్లో లోపం కలిగించినందుకు కొత్త బైక్ ఇవ్వాలంటూ హైదరాబాద్‌ జిల్లా వినియోగదారుల కమిషన్‌-1 ప్రతివాద సంస్థలను ఆదేశించింది. దిల్‌సుఖ్‌నగర్‌కు చెందిన సీహెచ్‌.రవింద్రబాబు అనే న్యాయవాది కమిషన్‌ను ఆశ్రయించగా.. విచారించిన బెంచ్‌ 45 రోజుల్లో తీర్పు అమలు చేయాలని తీర్పు వెలువరించింది. 2017లో కొనుగోలు చేసిన హోండా సీబీ షైన్‌ వాహనం తరచూ మరమ్మతులకు గురవ్వడం, సమస్యను గుర్తించడంలో ప్రతివాద సంస్థలు హోం మోటర్‌ సైకిల్‌ అండ్‌ స్కూటర్‌ ఇండియా ప్రయివేటు లిమిటెడ్‌, మలక్‌పేట్‌లోని ఆది మోటార్స్‌ విఫలమయ్యాయంటూ ఫిర్యాదీ.. కమిషన్‌కు తెలిపారు. సాక్ష్యాధారాలు పరిశీలించి బెంచ్‌ తీర్పు వెలువరించింది.