తెలంగాణలో ఈ నెలాఖరు వరకు విద్యాసంస్థలు, థియేటర్లు మూసివేత

16:14 March 14

తెలంగాణలో ఈ నెలాఖరు వరకు విద్యాసంస్థలు, థియేటర్లు మూసివేత

కరోనా కారణంగా రాష్ట్ర ప్రభుత్వం ముందు జాగ్రత్త చర్యలు చేపట్టింది. ఇటలీ నుంచి వచ్చిన ఒకరికి కరోనా పాజిటివ్​గా తేలడం, మరో ఇద్దరికి లక్షణాలు కనిపించినందున ప్రభుత్వం కీలక నిర్ణయాలు తీసుకుంది. ఈ నెలాఖరు వరకు విద్యాసంస్థలు, థియేటర్లు, మాల్స్​ మూసివేయాలని​ ఆదేశించింది. ముఖ్యమంత్రి అధ్యక్షతన జరిగిన ఉన్నతస్థాయి సమావేశంలో ఈ నిర్ణయాలు తీసుకున్నారు. ప్రస్తుతం పరీక్షల సీజన్ అయినందున వాటిని మాత్రం షెడ్యూల్ ప్రకారమే నిర్వహిస్తారు.

 అసెంబ్లీ సమావేశాలను కూడా కుదించాలని నిర్ణయం తీసుకున్నారు. వాస్తవానికి గతంలో నిర్ణయించిన షెడ్యూల్‌ ప్రకారం ఈ నెల 20 వరకు జరగాల్సి ఉన్నప్పటికీ ప్రస్తుత పరిస్థితుల నేపథ్యంలో సోమవారంతో ముగించాలని నిర్ణయించారు. ఆదివారం సెలవైనా రేపు సభ కార్యక్రమాలు ఉంటాయి. సోమవారం ఆఖరిరోజు ద్రవ్య వినిమయ బిల్లుపై చర్చించి ఆమోదం తెలిపిన అనంతరం సభను నిరవధికంగా వాయిదా వేయనున్నారు.