క్వారంటైన్ ముద్ర వేసినా లెక్కచేయకుండా చిందులేసింది!

హోమ్​ క్వారంటైన్​ ఉండాలన్న ప్రభుత్వ ఆదేశాలను బేఖాతరు చేసి కటకటాల పాలైంది ఓ మహిళ. సింగపూర్​ నుంచి వచ్చిన ఆమెను 14 రోజులు స్వీయ నిర్బంధంలో ఉండాలని సూచించారు. కానీ లెక్కచేయకుండా ప్రియుడితో కలిసి చిందులేసింది. అపార్టుమెంటు వాసులు చూసి పోలీసులకు పట్టించారు.

సింగపూర్​ నుంచి వచ్చి హోమ్​ క్వారంటైన్​లో ఉండకుండా అర్ధరాత్రి వరకు చిందులేసిన ఓ మహిళపై బోయిన్​పల్లి పోలీసులు కేసు నమోదు చేశారు. నిజామాబాద్​కు చెందిన ఆమె కొంతకాలంగా భర్త, పిల్లలతో కలిసి సింగపూర్​లో స్థిరపడింది. సెలవులపై నాలుగు రోజుల క్రితం నగరానికి వచ్చింది. విమానాశ్రయంలో అధికారులు కరోనా పరీక్షలు చేసి చేతిపై ముద్ర వేసి హోం క్వారంటైన్​లోనే ఉండాలని చెప్పి పంపారు.

ఆమె స్వస్థలానికి చేరుకోకుండా ఓల్డ్​ బోయిన్​పల్లి రాజారెడ్డి కాలనీలో గల సాయిరెసిడెన్సీలో ఓ ఫ్లాట్​కు చేరుకుంది. ఓ యువకుడి​తో కలిసి ఆదివారం నాడు అర్ధరాత్రి వరకు పార్టీ చేసుకుంది. మద్యం తాగి ఇష్టానుసారంగా చిందులేసింది. గమనించిన అపార్ట్​మెంటు వాసులు సోమవారం సాయంత్రం మహిళను నిలదీశారు. ఆ సమయంలోనే ఆమె చేతికి క్వారంటైన్​ స్టాంప్​ గమనించారు. వెంటనే బంధించి పోలీసులకు సమాచారం అందించారు.

మహిళను, యువకుడిని పోలీసులు విచారించగా... అతను బాయ్​ఫ్రెండ్​ అని తేలింది. వారిద్దరిపై కేసు నమోదు చేసి ప్రభుత్వ క్వారంటైన్​ కేంద్రానికి తరలించారు. ఆ ఫ్లాట్​ ఎవరిది? అక్కడ ఆమె ఇంకా ఏం చేసింది? ఎవరెవరిని కలిసింది? అనే కోణంలో పోలీసులు విచారిస్తున్నారు.