జీహెచ్​ఎంసీలో పెరుగుతున్న కరోనా కేసులు

గ్రేటర్ హైదరాబాద్‌ పరిధిలో కరోనా తీవ్రత కొనసాగుతోంది. కరోనా పాజిటివ్ నిర్ధరణ అయిన వారిలో సాధారణ గృహిణులు, వైద్య విద్యార్థులు కూడా ఉన్నారు. ఉస్మానియా మెడికల్‌ కళాశాల పీజీ విద్యార్దుల హాష్టల్‌లో వైద్యులు కరోనా బారిన పడగా... వారందరికీ పరీక్షలు నిర్వహించారు. ముషీరాబాద్​లో కరోనాతో ఓ వ్యక్తి మృతిచెందినట్లు వైద్యులు నిర్ధారించారు.

గ్రేటర్ పరిధిలో కరోనా కోరలు చాస్తోంది. ప్రాంతాలతో నిమిత్తం లేకుండా... నగర నలుమూలలా విస్తరిస్తోంది. కుత్బుల్లాపూర్ నియోజకవర్గంలో నాలుగు కరోనా పాజిటివ్ కేసులు నమోదయ్యాయి. ఎస్​ఎస్​బీ నగర్​లో 66 ఏళ్ల వృద్ధురాలికి, అల్వీన్​ కాలనీలో ఒకే కుటుంబానికి చెందిన ఇద్దరికి, చింతల్​ వాణీ నగర్​లో మరో మహిళకు కరోనా పాజిటివ్​ వచ్చినట్టు ఆసుపత్రి వర్గాలు వెల్లడించాయి. నల్లకుంట ఫీవర్ ఆసుపత్రికి కరోనా లక్షణాలతో వచ్చిన 11 మందికి పరీక్షలు నిర్వహించారు. సోమవారం నాడు 25 మందికి పరీక్షలు నిర్వహించగా... ఐదుగురికి కరోనా సోకినట్టు నిర్ధారించారు. మరో ఐదుగురి రిపోర్ట్​లు అందాల్సి ఉందని ఆసుపత్రి సిబ్బంది వెల్లడించారు.

కరోనాతో వ్యక్తి మృతి

అంబర్​పేట్ డీడీ కాలనీలో ఓ ఇంజనీరింగ్ విద్యార్థికి, బాగ్ అంబర్​పేట్ తురబ్​నగర్​లో కిరాణ షాపు నిర్వహించే ఓ వ్యక్తికి, అంబర్​పేట్​లో చెన్నారెడ్డి మరో వ్యక్తికి, ఇదే నియోజకవర్గంలో ఓ గృహిణికి కరోనా కరోనా సోకినట్టు వైద్యులు తెలిపారు. ముషీరాబాద్ నియోజవర్గం పద్మశాలి కాలనీలో కరోనా వైరస్​తో ఓ వ్యక్తి మృతిచెందగా... ఆర్​ఎంపీ వైద్యుడికి, 73 ఓ ఏళ్ల వృద్ధుడికి కరోనా పాజిటివ్ వచ్చినట్టు ఆసుపత్రి వర్గాలు వెల్లడించాయి.

నేడు ఫలితాలు!

ఉస్మానియా వైద్య కళాశాలలో ఓ పీజీ విద్యార్ధికి కరోనా పాజిటివ్ వచ్చినందున... హాస్టల్ లో ఉన్న 296 మందికి పరీక్షలు నిర్వహించారు. ఇందులో 180 మంది యువతులు, 116 మంది యువకులు ఉన్నారు. పరీక్షలు చేసిన వారిలో 12 మందికి కరోనా పాజిటివ్ వచ్చినట్లు వైద్య సిబ్బంది వెల్లడించారు. మిగితా వారి టెస్ట్​ల ఫలితాలు ఇవాళ వచ్చే అవకాశముందని పేర్కొన్నారు. రాజీవ్ గాంధీ అంతర్జాతీయ విమానాశ్రయంలో స్క్రీనింగ్ పరీక్షలు నిర్వహించే ఓ ఉద్యోగికి కరోనా పాజిటివ్ వచ్చింది. గాంధీలో చికిత్స పొంది పూర్తి కోలుకున్నట్టు ఆసుపత్రి వర్గాలు పేర్కొన్నాయి.

ఇదీ చూడండి:ప్రధాని మోదీకి ముఖ్యమంత్రి కేసీఆర్ లేఖ