CM KCR WISHES TO BATHUKAMMA FESTIVAL: తెలంగాణ ప్రజలకు ముఖ్యమంత్రి కేసీఆర్ బతుకమ్మ పండగ శుభాకాంక్షలు తెలిపారు. తీరొక్క పువ్వుతో బతుకమ్మను పేర్చి ఆడుతూ పాడుతూ ఆనందోత్సాహాల నడుమ జరిగే బతుకమ్మ వేడుకలు పల్లెల్లో ప్రత్యేకతను చాటుతాయని తెలిపారు. ప్రకృతిని ఆరాధిస్తూ, తొమ్మిది రోజుల పాటు సాగే ఉత్సవాల సందర్భంగా రాష్ట్ర వ్యాప్తంగా సాంస్కృతిక శోభ వెల్లివిరుస్తుందని చెప్పారు. బతుకమ్మ పండుగను రాష్ట్ర పండుగగా గుర్తించిన ప్రభుత్వం, తెలంగాణ సంస్కృతి, ఆడబిడ్డల ఆత్మగౌరవానికి పెద్దపీట వేసిందని అన్నారు.
దాదాపు రూ.350 కోట్లతో రాష్ట్ర వ్యాప్తంగా సుమారు కోటి మంది ఆడబిడ్డల కోసం ప్రత్యేకంగా తయారు చేయించిన చీరలను వారికి బతుకమ్మ కానుకగా అందిస్తున్నామని సీఎం కేసీఆర్ అన్నారు. ప్రజల జీవనంలో భాగమైన ‘బతుకమ్మ’ ఖండాంతరాలకు విస్తరించి తెలంగాణ సంస్కృతిని విశ్వవ్యాప్తం చేసిందని ముఖ్యమంత్రి తెలిపారు. బతుకమ్మ పండుగ కోసం రాష్ట్ర ప్రభుత్వం అన్ని ఏర్పాట్లు చేసిందని చెప్పారు. రాష్ట్ర ప్రజలంతా ఆయురారోగ్యాలతో సుఖంగా జీవించాలని సీఎం ఆకాంక్షించారు.