వచ్చే ఆర్థిక సంవత్సరం నుంచి కరెంటు ఛార్జీలు పెంచాలా వద్దా అనే అంశంపై సీఎం కేసీఆర్ నేడు నిర్ణయం తీసుకోనున్నారు. ఛార్జీల పెంపు ప్రతిపాదనలను ముఖ్యమంత్రికి విద్యుత్‌ పంపిణీ సంస్థ(డిస్కం)లు శుక్రవారం అందజేశాయి. వాటిపై ఈ రోజు ఉన్నతాధికారులతో సీఎం సమీక్ష చేసే అవకాశముంది. తర్వాతనే ఛార్జీల విషయమై స్పష్టత ఇస్తారని సమాచారం. సీఎం నిర్ణయం వెలువడ్డాక వచ్చే ఏడాదికి సంబంధించిన ‘వార్షిక ఆదాయ అవసరాల’(ఏఆర్‌ఆర్‌) నివేదికను విద్యుత్‌ నియంత్రణ మండలి(ఈఆర్‌సీ)కి డిస్కంలు అందజేస్తాయి.
అదనంగా కావాలి..
వచ్చే ఏడాది డిస్కంల ఆదాయ, వ్యయాల మధ్య అంతరం రూ.11 వేల కోట్ల వరకూ ఉంటుందని అంచనా. ఈ సొమ్మును ప్రభుత్వం రాయితీగా బడ్జెట్లో కేటాయించాలి. లేనిపక్షంలో ఆ మేర ఛార్జీలు పెంచాలి. ప్రస్తుత ఆర్థిక సంవత్సరంలో రూ.8 వేల కోట్లను రాయితీ పద్దు కింద బడ్జెట్లో ప్రభుత్వం ఇచ్చింది. అవి సరిపోక అదనంగా ఇవ్వాలని డిస్కంలు కోరుతున్నాయి.