CBN FIRE: ఆంధ్రప్రదేశ్లోని కుప్పంలో ఓ హోటల్‌పై వైకాపా కౌన్సిలర్ల దాడిని తెదేపా అధినేత చంద్రబాబు ఖండించారు. కుప్పంలో ఎన్నడూ లేని దాడుల సంస్కృతిని వైకాపా తీసుకొచ్చిందని ధ్వజమెత్తారు. భోజనం అయిపోయిందని చెప్పిన హోటల్ సిబ్బందిపై.. వైకాపా నాయకులు దాడి చేయడం దారుణమన్నారు. ఫర్నీచర్ ధ్వంసం చేసి మహిళలను బెదిరించిన వారిపై తక్షణం చర్యలు తీసుకోవాలని చంద్రబాబు డిమాండ్ చేశారు.
"హోటల్ తగలబెడతాం, నిర్వాహకులను చంపేస్తాం అంటూ బెదిరిస్తుంటే.. పోలీసులు ఏం చేస్తున్నారు" అని చంద్రబాబు నిలదీశారు. కఠిన చర్యలతో క్రిమినల్ కార్యకలాపాలకు ముగింపు పలకాల్సిన బాధ్యత పోలీసులపై ఉందని గుర్తు చేశారు. బాధిత కుటుంబానికి తెలుగుదేశం అండగా ఉంటుందని ట్విట్టర్ వేదికగా భరోసా ఇచ్చారు.