ఆర్టీసీ, మెట్రోలో మహిళలకు ఉచిత ప్రయాణం: కిషన్ రెడ్డి

గ్రేటర్​ హైదరాబాద్​లో అధికారంలోకి రాగానే అర్హులైన వరద బాధితులందరికీ ఆర్థిక సాయం అందిస్తామని కేంద్రమంత్రి కిషన్ రెడ్డి వెల్లడించారు. నగరంలో రౌడీయిజాన్ని అంతం చేసి ప్రజలకు సుపరిపాలన అందిస్తామన్నారు.

హైదరాబాద్​లో రౌడీయిజాన్ని అంతం చేసి ప్రజలకు సుపరిపాలన అందిస్తామని కేంద్రమంత్రి కిషన్ రెడ్డి అన్నారు. గ్రేటర్ ఎన్నికల్లో భాగంగా స్థానిక అమీర్​పేట్​ చౌరస్తాలోని సత్య థియేటర్ వద్ద భాజపా అభ్యర్థి కేతినేని సరళకు మద్దతుగా నిర్వహించిన బహిరంగ సభకు హాజరయ్యారు. హైదరాబాద్​ మేయర్ పీఠాన్ని కైవసం చేసుకుంటామని ధీమా వ్యక్తం చేశారు. రాష్ట్రంలో ప్రజలందరికీ కరోనా మందు అందేలా భాజపా కృషి చేస్తుందని... ఆ ఘనత ప్రధాని మోదీకే దక్కుతుందన్నారు.

నగరంలో తాగునీటి కొరత తీర్చి ఉచిత మంచినీరు పంపిణీ చేస్తామన్నారు. మహిళలకు ఆర్టీసీ, మెట్రోలో ఉచిత ప్రయాణ సౌకర్యం కల్పిస్తామని కిషన్ రెడ్డి అన్నారు. వరద సాయం అందని బాధితులకు గ్రేటర్​లో అధికారంలోకి రాగానే అర్హులైన ప్రతి ఒక్కరికీ మొట్టమొదటిగా ఆర్థిక సాయం అందేలా చర్యలు తీసుకుంటామన్నారు. జీహెచ్ఎంసీ ఎన్నికల్లో భాజపా అభ్యర్థులను గెలిపించాలని విజ్ఞప్తి చేశారు.

ఇదీ చూడండి:జోరుమీదున్న భాజపా... రంగంలోకి అమిత్​ షా