మరోసారి వివేకా ఇంటిని పరిశీలించిన సీబీఐ

మాజీ మంత్రి వైఎస్‌ వివేకానందరెడ్డి హత్య కేసులో సీబీఐ అధికారులు నాలుగో రోజు విచారణ చేపట్టారు. ఆంధ్రప్రదేశ్​ పులివెందులలోని డీఎస్పీ కార్యాలయానికి చేరుకున్న సీబీఐ బృందం హత్యకు సంబంధించి మరిన్ని వివరాలు సేకరిస్తున్నారు.

మాజీ మంత్రి వైఎస్‌ వివేకానందరెడ్డి హత్య కేసులో సీబీఐ అధికారులు నాలుగో రోజు విచారణ చేపట్టారు. ఏపీ పులివెందులలోని డీఎస్పీ కార్యాలయానికి చేరుకున్న సీబీఐ బృందం.. హత్యకు సంబంధించి మరిన్ని వివరాలు సేకరిస్తున్నారు. మూడు రోజుల విచారణలో భాగంగా పులివెందులలోని వివేకా నివాసానికి చేరుకున్న సీబీఐ అధికారులు... రెండు గంటలకు పైగానే పరిశీలించారు. వివేకా హత్యకు గురైన బెడ్ రూం, బాత్ రూం ప్రదేశాలను క్షుణ్ణంగా పరిశీలించారు.

వివేకా భార్య సౌభాగ్యమ్మతో మాట్లాడి వివరాలు అడిగి తెలుసుకున్నారు. వివేక ఇంటి కొలతలనూ అధికారులు తీసుకున్నారు. మున్సిపాలిటీ సర్వేయర్​ ద్వారా కొలతలు వేయించారు. మాజీ మంత్రి ఇంటి బెడ్​రూం, బాత్​రూంతోపాటు ఎన్ని గదులు, ఎన్ని కిటికీలు ఉన్నాయని ఆరా తీశారు. నిన్న కుటుంబ సభ్యులను నాలుగు గంటల పాటు విచారించారు.

వివేకా ఇంట్లోకి స్థానిక పోలీసులను సైతం అనుమతించకుండా కేవలం సీబీఐ అధికారులు మాత్రమే తలుపులు వేసుకుని పరిశీలించారు. విచారణలో భాగంగా..... గతంలో వివేకా కుమార్తె సునీత వేసిన పిటిషన్​లోని 15 మంది అనుమానితుల వివరాలను అడిగి తెలుసుకున్నట్లు తెలుస్తోంది. వివేకా ఇంట్లో లభ్యమైన లేఖలో కారు డ్రైవర్ ప్రసాద్ ఇబ్బంది పెడుతున్నట్లు రాయడంతో.. అధికారులు ప్రసాద్​ను లోతుగా విచారణ చేసే అవకాశం ఉన్నట్లు సమాచారం.

ఇవీ చూడండి: దేవాదాయ నిధులను అమ్మఒడికి ఎలా మళ్లిస్తారు?: కన్నా