19:30 February 25
అభిషేక్ మొహంతిని రెండు వారాల్లో విధుల్లోకి తీసుకోవాలని సీఎస్కు క్యాట్ ఆదేశం
CAT Fires on TS CS: ఐపీఎస్ అధికారి అభిషేక్ మొహంతిని రెండు వారాల్లో విధుల్లోకి తీసుకోవాలని సీఎస్ సోమేశ్ కుమార్ను కేంద్ర పరిపాలన ట్రైబ్యునల్ ఆదేశించింది. సీఎస్ సోమేశ్ కుమార్పై అభిషేక్ మొహంతి దాఖలు చేసిన కోర్టు ధిక్కరణ పిటిషన్ను ట్రైబ్యునల్ ఇవాళ మరోసారి విచారణ చేపట్టింది. అధికారుల విభజనలో భాగంగా అభిషేక్ మొహంతిని కేంద్ర ప్రభుత్వం ఆంధ్రప్రదేశ్కు కేటాయించింది. కేటాయింపు ఉత్తర్వులను సవాల్ చేస్తూ అభిషేక్ మొహంతి కేంద్ర పరిపాలన ట్రైబ్యునల్ను ఆశ్రయించారు.
ఎనిమిది నెలలు అయినా...
విచారణ జరిపిన క్యాట్... అభిషేక్ మొహంతిని రిలీవ్ చేయాలని ఏపీకి.. విధుల్లో చేర్చుకోవాలని తెలంగాణను ఎనిమిది నెలల క్రితం ఆదేశించింది. క్యాట్ ఆదేశాల మేరకు అభిషేక్ను ఏపీ ప్రభుత్వం రిలీవ్ చేసింది. అయితే తెలంగాణ ప్రభుత్వం తనను విధుల్లోకి తీసుకోవడం లేదంటూ సీఎస్ సోమేశ్ కుమార్పై అభిషేక్ మొహంతి క్యాట్లో కోర్టు ధిక్కరణ పిటిషన్ వేశారు. గతంలో విచారణ జరిపిన క్యాట్.. ఇవాళ హాజరు కావాలని సోమేష్ కుమార్ ఆదేశించింది.
సీఎస్పై క్యాట్ ఆగ్రహం
హాజరుకు మినహాయింపు ఇవ్వాలని త్వరలో కౌంటరు దాఖలు చేస్తామని అడ్వొకేట్ జనరల్ బీఎస్ ప్రసాద్ క్యాట్ను కోరారు. నిరాకరించిన ట్రైబ్యునల్ గంటలోగా కనీసం ఆన్ లైన్లో హాజరు కావాలని లేకపోతే నాన్ బెయిలబుల్ వారంట్ జారీ చేస్తామని హెచ్చరించింది. కొద్దిసేపటి తర్వాత వర్చువల్ విచారణకు హాజరైన సోమేష్ కుమార్.. అభిషేక్ మహంతి వ్యవహారంపై కేంద్రానికి లేఖ రాశామని క్యాట్కు తెలిపారు. తాము ఆదేశించినప్పటికీ.. విధుల్లోకి ఎందుకు తీసుకోలేదని ధర్మాసనం ఆగ్రహం వ్యక్తం చేసింది. తమ ఆదేశాలతోనే తెలంగాణలో కొనసాగుతున్నారంటూ సోమేశ్ కుమార్ను ఉద్దేశించి వ్యాఖ్యానించిన ట్రైబ్యునల్... అవసరమైతే తమ ఉత్తర్వులను పునఃసమీక్షిస్తామని హెచ్చరించింది.
ఇదీ చదవండి :చిత్ర కురులు మెచ్చిన 'హిమాలయన్ యోగి' అతడే.. తెలిసిపోయిందిగా!
