బుధవారం చైనా నుంచి హైదరాబాద్‌కు వచ్చిన ఒక యువ వైద్యుడు జలుబు, దగ్గు లక్షణాలతో ఫీవర్ ఆసుపత్రిలో చేరిన సంగతి తెలిసిందే. ఆ యువకుడి నుంచి నమూనాలను సేకరించి పుణెలోని వైరాలజీ ప్రయోగశాలకు పంపించగా, శుక్రవారం(23న) కరోనా వైరస్‌ లేదని తేలింది. ఇదే తరహాలో ఆదివారం మరో నలుగురు ఫీవర్ ఆసుపత్రిలో చేరారు. వీరిలో ముగ్గురు చైనా, హాంగ్‌కాంగ్‌ దేశాల నుంచి వచ్చిన వ్యక్తులు కాగా, మరొకరు ఆ ముగ్గురి ప్రయాణికుల్లో ఒకరి భార్య. ఈ నలుగురినీ ఆసుపత్రిలో చేర్చుకొని, వేర్వేరు గదుల్లో ఉంచి వైద్య పర్యవేక్షణలో సునిశితంగా గమనిస్తున్నారు. ఒక వ్యక్తి(40)లో మాత్రమే జలుబు, దగ్గు, జ్వర లక్షణాలు కనిపిస్తుండగా.. ఆ వ్యక్తి నుంచి నమూనాలను సేకరించి ప్రత్యేక వాహనంలో రోడ్డు మార్గంలో పుణెకు పంపించారు. ఈ నమూనా ఫలితాలు ఇవాళ వస్తాయని వైద్యవర్గాలు తెలిపాయి.
మిగిలిన ముగ్గురిలో ఇద్దరు భార్యాభర్తలు. వీరి ముగ్గురిలోనూ ముక్కు కారడం తప్ప మరే ఇతర లక్షణాలు లేవు. ప్రసార సాధనాల్లో కరోనా వైరస్‌ గురించి వస్తున్న కథనాలపై భయాందోళనలకు గురై, ముందస్తు జాగ్రత్తగా వారంతట వారే స్వచ్ఛందంగా ఆసుపత్రిలో చేరినట్లుగా వైద్యులు చెప్పారు. ఆసుపత్రిలో చేరిన నలుగురిని నిశితంగా పరిశీలిస్తున్నామనీ, ప్రస్తుతానికి జలుబుకు సంబంధించిన సాధారణ చికిత్స మాత్రమే అందజేస్తున్నట్లు నిపుణులు పేర్కొన్నారు.
పుణె నుంచి సోమవారం వెలువడే ఫలితం ప్రతికూలంగా వచ్చినా.. ఆసుపత్రిలో చేరిన వారి ఆరోగ్య పరిస్థితి ఉన్నట్టుండి విషమించినా.. వారికి అత్యవసర చికిత్స కోసం గాంధీ ఆసుపత్రికి తరలించడానికి అక్కడ ప్రత్యేకంగా 8 పడకల ఐసీయూను కూడా వైద్యఆరోగ్యశాఖ సిద్ధం చేసింది.