Corona Booster Dose : ప్రైవేటు కంపెనీలో పనిచేస్తున్న శ్రీనివాస్‌కు ఇది వరకే కరోనా సోకింది. అనంతరం రెండో డోసు టీకా కూడా తీసుకున్నారు. తాజాగా ముందస్తు నివారణ టీకా(బూస్టర్)కు సిద్ధమయ్యారు. ఇంతలో మళ్లీ వైరస్‌ సోకింది. దీంతో బూస్టర్ డోసు ఎప్పుడు తీసుకోవాలనేది సందేహం. చాలామంది పరిస్థితి ఇలాగే ఉంది. పలువురు మొదటి, రెండో విడతల్లో కొవిడ్ బారిన పడ్డారు. టీకా అందుబాటులోకి రావడంతో రెండు డోసులు తీసుకున్నారు. ఇలాంటి వారు వ్యాక్సిన్‌ తీసుకొని 6 నుంచి 9 నెలల కూడా దాటింది. బూస్టర్‌కు సిద్ధమవుతున్న సమయంలోనే చాలామంది మళ్లీ మహమ్మారి బారిన పడుతున్నారు. వారంతా ఇంటి వద్దే ఉంటూ కోలుకుంటున్నారు. ఇంతకుముందు తీసుకున్న రెండు డోసుల వ్యాక్సిన్‌ కారణంగా ఆసుపత్రుల్లో చేరాల్సిన పరిస్థితి ఉండటం లేదు. తాజాగా మళ్లీ వైరస్‌ బారిన పడిన నేపథ్యంలో ఎన్ని రోజుల తర్వాత బూస్టర్ తీసుకోవాలనేది చర్చనీయాంశమవుతోంది.
Covid Booster Dose : తొలి, రెండు దశల్లో మహమ్మారి సోకిన అనంతరం 3 నెలల తర్వాత టీకా తీసుకోవాలని వైద్యులు సూచించారు. అప్పటివరకు సహజసిద్ధమైన యాంటీబాడీలు శరీరంలో ఉన్నందున 3 నెలలలోపు మళ్లీ వైరస్‌ సోకే అవకాశం తక్కువ. రెండోసారి ఇన్‌ఫెక్షన్‌ సోకి కోలుకున్న తర్వాత కూడా మూడు నెలల వరకు టీకా అవసరం లేదని వైద్యులు చెబుతున్నారు. 90 రోజులు దాటిన అనంతరం బూస్టర్ తీసుకోవచ్చునని సూచిస్తున్నారు.
పరీక్షలకు దూరంగా ఉంటే..
Corona Booster Dose in Telangana : చాలామందిలో ఒమిక్రాన్‌లో స్వల్ప లక్షణాలే ఉంటున్నాయి. జలుబు, దగ్గు, జ్వరం, గొంతులో గరగర, పొడి దగ్గు ఎక్కువ మందిలో ఉంటోంది. కొందరు పరీక్షలు చేయించుకోవడం లేదు. ఈ లక్షణాలు ఉంటే.. అనుమానంతో ఇంట్లోనే ఉంటూ చికిత్సలు తీసుకుంటున్నారు. 3-5 రోజుల్లో తగ్గిపోతుండటంతో బయటకు వచ్చేస్తున్నారు. పరీక్షలు చేయించుకోని వారికి వైరస్‌ సోకింది.. లేనిది చెప్పడం కష్టమే. మహమ్మరి సోకి...పరీక్షలు చేయించుకోకపోతే.. బూస్టర్ డోసు ఎప్పుడు తీసుకోవాలనేది ప్రశ్నార్థకంగా మారింది. ఇలాంటి వారు ఐజీఎం, ఐజీజీ యాంటీబాడీల పరీక్షలు చేసుకుంటే శరీరంలో యాంటీబాడీలు ఉన్నవి.. లేనివి తెలిసిపోతుందని వైద్యులు చెబుతున్నారు. ఐజీఎం టెస్టులో యాంటీబాడీలు ఉంటే ఇటీవలే కరోనా సోకినట్లు లెక్క. ఐజీజీలో పరీక్షలో యాంటీబాడీలు ఉంటే...గతంలో కరోనా లేదా టీకా కారణంగా యాంటీబాడీలు తయారైనట్లు అంచనా. ఈ రిపోర్టుల ప్రకారం వైద్యుల సూచనలతో టీకాలు తీసుకోవచ్ఛు ఎక్కువ యాంటీబాడీలు ఉంటే...అప్పటికప్పుడు బూస్టర్ అవసరం లేదని, మూడు నెలల వరకు నిరీక్షించినా ఇబ్బంది ఉండదని వైద్యులు పేర్కొంటున్నారు.