గోదావరి బోటు ప్రమాదం జరిగి నేటికి 9 రోజులవుతోంది. గాలింపు చర్యలు నామమాత్రంగానే జరుగుతున్నాయనే ఆరోపణలోస్తున్నాయి. గల్లంతైన ఒక మహిళ మృతదేహం ఆదివారం లభ్యమైంది. ఆ మృతదేహాన్ని ఎవరూ గుర్తించలేకపోవటం వల్ల... రాజమహేంద్రవరం ప్రభుత్వాసుపత్రిలో భద్రపర్చారు. ఇన్ని రోజుల తర్వాత ఆచూకీ లభ్యమవ్వటం వల్ల మృతదేహాలు పూర్తిగా పాడైపోతున్నాయి. గుర్తించడం కష్టమవుతోంది. పరీక్షలు నిర్వహించిన తర్వాతే బంధువులకు అప్పగించనున్నట్లు అధికారులు, వైద్యులు ప్రకటించారు.
బోటు వెలికితీతకు సహకారం....
బోటు ప్రమాదంపై కేంద్ర హోంశాఖ సహాయమంత్రి కిషన్‌రెడ్డి, తూర్పుగోదావరి జిల్లా యంత్రాంగం, ఎన్డీఆర్ఎఫ్ బృందాలతో విపత్తు నిర్వహణ కమిటీ సమావేశం నిర్వహించారు. విషాదానికి దారితీసిన పరిస్థితులను అడిగి తెలుసుకున్నారు. మరో సారి ఇలాంటి ఘటనలు పునరావృతం కాకుండా చూడాలని అధికారులను హెచ్చరించారు. బోటు వెలికితీతకు అవసరమైన సహాయ సహకారాలు కేంద్రంనుంచి అందిస్తామని అన్నారు. బోటు వెలికితీసేందుకు ఉన్న అన్ని అవకాశాలు పరిశీలించామని... నిపుణులతో చర్చించామని ఇప్పటివరకూ సాధ్యం కాలేదని తూర్పుగోదావరిజిల్లా కలెక్టర్‌ మురళీధర్‌రెడ్డి చెప్పారు.