దొంగ రిజిస్ట్రేషన్లకు ధరణి స్వర్గధామం: మురళీధర్​ రావు

ధరణి పోర్టల్​ వల్ల తీవ్ర నష్టం వాటిల్లుతుందని భాజపా సీనియర్​ నేత మురళీధర్​ రావు ఆరోపించారు. ఈ పద్ధతి దొంగ రిజిస్ట్రేషన్లు చేసుకునేవారికి స్వర్గధామంగా మారిందని మండిపడ్డారు. పాత పద్ధతిలోనే రిజిస్ట్రేషన్లు చేయాలని డిమాండ్ చేశారు.

విప్లవాత్మక మార్పులు తీసుకువస్తామంటూ... వ్యవసాయేతర ఆస్తుల రిజిస్ట్రేషన్​ ప్రక్రియ నిలిపివేసి ధరణి పోర్టల్​ తీసుకురావడం వల్ల తీవ్ర నష్టం వాటిల్లుతోందని భాజపా సీనియర్ నేత మురళీధర్​ రావు ఆరోపించారు. రాష్ట్రవ్యాప్తంగా 142 రిజిస్ట్రార్​ కార్యాలయాల్లో సేవలు నిలిచిపోవడం వల్ల... స్టాంప్​ వెండర్స్​ తీవ్ర ఇబ్బందులు పడుతున్నారని ఆవేదన వ్యక్తం చేశారు.

దొంగ రిజిస్ట్రేషన్లు చేసుకునేవారికి ధరణి పోర్టల్ స్వర్గధామంగా మారిందని మురళీధర్​ రావు విమర్శించారు. కార్డు ద్వారా రిజిస్ట్రేషన్​ కొనసాగిస్తామని చెప్పిన ప్రభుత్వం... ధరణితోనే కొనసాగిస్తూ హైకోర్టుకు తప్పుడు సమాచారం ఇచ్చిందని మండిపడ్డారు. ధరణి పోర్టల్​ పట్ల తహసీల్దార్లు, సబ్​ రిజిస్ట్రార్​ర్లకు కనీసం ఒక రోజు కూడా శిక్షణ ఇవ్వలేదని... అలాంటప్పుడు అవగాహన లేకుండా ఎలా పనిచేస్తారని ప్రశ్నించారు. ధరణిని వెంటనే వెనక్కి తీసుకోవాలని డిమాండ్ చేశారు.

ఇదీ చూడండి:'2023లో అధికారంలోకి వచ్చేందుకు ఈ ఎన్నికలే మార్గం'