'సాగర్ పర్యటనకు ముందే గిరిజనులకు సీఎం హామీ ఇవ్వాలి'

గుర్రంబోడు తండాలో ఆక్రమించుకున్న భూమిపై గిరిజనులకు సీఎం కేసీఆర్​ స్పష్టమైన హామీ ఇచ్చి.. నాగార్జున సాగర్​లో పర్యటించాలని భాజపా రాష్ట్ర అధ్యక్షుడు బండి సంజయ్‌ డిమాండ్ చేశారు. హుజూర్​నగర్ నియోజకవర్గంలో జరుగుతున్న భూదందాకు బాధ్యులపై చట్టపరమైన చర్యలు తీసుకోవాలన్నారు. కబ్జాలకు పాల్పడినవారిని వెంటనే అరెస్ట్ చేయాలన్నారు.

తాము లేవనెత్తిన అంశాలపై నాగార్జునసాగర్ పర్యటనకు ముందే.. సీఎం కేసీఆర్ స్పష్టత ఇవ్వాలని భాజపా రాష్ట్ర అధ్యక్షుడు బండి సంజయ్‌ డిమాండ్ చేశారు. రాష్ట్రంలో గిరిజనుల హక్కులను సీఎం కాలరాస్తున్నారని విమర్శించారు. వారికి సాగర్ పర్యటనకు ముందే క్షమాపణలు చెప్పాలన్నారు.

హుజూర్‌నగర్ నియోజకవర్గంలోని గుర్రంబోడు తండాలో ఆక్రమించుకున్న భూమిపై స్పష్టత ఇవ్వాలని బండి సంజయ్‌ అన్నారు. నాగార్జునసాగర్ ముంపునకు గురైన రైతులకు భూములు కేటాయిస్తే.. ఆ భూములను అధికార పార్టీ నాయకులు కబ్జా చేశారని ఆగ్రహం వ్యక్తం చేశారు. అక్రమ డాక్యుమెంట్లు తయారుచేసి గిరిజనుల నుంచి లాక్కున్న విషయం వాస్తవం కాదా అని ప్రశ్నించారు.

గుర్రంపోడు తండాలో గిరిజనులపై లాఠీఛార్జ్ చేసి కేసులు బనాయించడానికి కారణమైన పోలీసు అధికారులపై చర్యలు తీసుకోవాలన్నారు. ఈ మొత్తం వ్యవహారంపై సమగ్ర విచారణ జరిపించాలన్నారు. కబ్జాలకు పాల్పడినవారిని వెంటనే అరెస్ట్ చేయాలని భాజపా డిమాండ్ చేస్తోందని బండి సంజయ్‌ ఓ ప్రకటనలో పేర్కొన్నారు. గిరిజనుల సమస్యలపై కేసీఆర్ తన చిత్తశుద్ధిని నిరూపించుకోకపోతే నాగార్జునసాగర్ ఎన్నికల్లో ప్రజలు తగిన బుద్ధి చెబుతారని హెచ్చరించారు.

ఇదీ చూడండి:'జీహెచ్ఎంసీ మేయర్ ఎన్నికలో భాజపా పోటీ చేస్తుంది'