KTR Davos Tour: రాబోయే ఇరవయ్యేళ్లలో మంత్రి కేటీఆర్ భారతదేశానికి ప్రధానమంత్రి అయినా ఆశ్చర్యపోవాల్సిన అవసరం లేదని అమెరికాలోని ప్రముఖ వెంచర్‌ క్యాపిటలిస్టు, మహిళా వ్యాపారవేత్త ఆశా జడేజా మోత్వాని ప్రశంసల జల్లు కురిపించారు. అన్ని అంశాలపై స్పష్టమైన అవగాహన, భావ వ్యక్తీకరణ ఉన్న ఇలాంటి యువ రాజకీయ నాయకుడిని తన జీవితంలో ఎప్పుడూ చూడలేదని ట్విటర్‌లో వ్యాఖ్యానించారు. మంత్రి కేటీఆర్ బృందం తెలంగాణకు పెట్టుబడులను ఆహ్వానించే విషయంలో అద్భుతమైన కృషి చేస్తోందన్నారు.
తెలంగాణ బృందం పెట్టుబడులకు ఆహ్వానిస్తున్న తీరు.... తనకు సిలికాన్ వ్యాలీ స్టార్టప్ రోజులను గుర్తుచేస్తుందని తెలిపారు. బిలియన్ డాలర్ల పెట్టుబడులతో కేటీఆర్ బృందం తిరిగివెళ్లేలా ఉన్నారని ఆశా జడేజా ట్వీట్ లో పేర్కొన్నారు..తమ రాష్ట్రంలో పెట్టుబడులకు అనుకూలతలను దావోస్ వేదికపై వివరిస్తూ దూసుకెళ్తోందన్నారు. మంగళవారం రోజు ఆమె తెలంగాణ పెవిలియన్‌లో మంత్రి కేటీఆర్‌ను కలిశారు. ఆయనతో దిగిన ఫొటోను ట్విటర్‌లో పంచుకున్నారు.