కొండల్లో, గుట్టల్లో, గడ్డ కట్టే చలిలో వారు మనల్ని, మన దేశాన్ని కాపాడుతున్నారు. ఇప్పుడు కంటికి కనిపించని శత్రువుతో దేశం పోరాడుతోంది. ఆ యుద్ధంలో మేము సైతం అంటూ ముందుకు వచ్చారు సైనికులు. ఆంధ్రప్రదేశ్ రాష్ట్రంలోని విశాఖ జిల్లా భీమిలి నియోజకవర్గం తగరపువలస పరిసర ప్రాంతాల ప్రజలకు కరోనా వైరస్పై అవగాహన కల్పిస్తూ స్వచ్ఛందంగా విధులు నిర్వహిస్తున్నారు.
దేశవ్యాప్తంగా లాక్డౌన్ కొనసాగుతున్న వేళ... రవాణా సౌకర్యం లేక కొందరు ఆర్మీ జవాన్లు ఇంటి వద్దనే ఉండిపోయారు. వీరంతా స్థానిక పోలీసుల అనుమతి తీసుకొని కరోనా వైరస్ వ్యాప్తి నియంత్రణకు కృషి చేస్తున్నారు. దుకాణాల వద్ద ప్రజలు భౌతిక దూరం పాటించేలా, ప్రజలు రోడ్లపైకి రాకుండా అవగాహన కల్పిస్తున్నారు.