ఏపీ మంత్రి జయరామ్పై మాజీ మంత్రి అయ్యన్నపాత్రుడు మరోసారి ధ్వజమోత్తారు. ఈఎస్ఐ కేసులో నిందితుడి నుంచి కారు తీసుకుని పుట్టినరోజు కానుకగా చెబుతున్నారని ఎద్దేవా చేశారు. మంత్రి కుమారుడు బెంజ్ కారును లంచంగా తీసుకున్నారని పేర్కొన్నారు. వాస్తవాలు ఒప్పుకుని నైతిక బాధ్యత వహించి మంత్రి పదవికి రాజీనామా చేయాలని అయ్యన్నపాత్రుడు డిమాండ్ చేశారు.
ఇప్పటికీ సీఎం జగన్ కాపాడతారా ?
ఇప్పటికీ మంత్రి జయరామ్‌ను సీఎం జగన్ కాపాడుకుంటూ వస్తారా..? అని అయ్యన్నపాత్రుడు ప్రశ్నించారు. అవినీతి నిరోధకశాఖకు ఫోన్ చేస్తే వెంటనే చర్యలు తీసుకుంటామన్నారని.. కానీ ఇప్పటివరకూ ఎలాంటి చర్యలు తీసుకోలేదన్నారు. ఈశ్వర్ బెంజ్ కారు తీసుకున్నట్లు సామాజిక మాధ్యమంలో పెట్టుకున్నారని గుర్తు చేసిన అయ్యన్న.. సదరు కారు వారి ఇంట్లోనే ఉందని స్పష్టం చేశారు. తమకు సంబంధం లేదని చెబుతూనే అదే కారులో తిరుగుతున్నారని మండిపడ్డారు. ఈఎస్ఐ కేసులో ఏ-14 నిందితుడు మంత్రి జయరామ్కు బినామీ అని అయ్యన్న పునరుద్ఘాటించారు. ఈ విషయంపై సీఎం జగన్ వెంటనే స్పందించాలన్నారు.
" ఆరోపణలు చేస్తే మతి భ్రమించిందంటున్నారు. కారు వారిది కాదంటూనే... అదే కారులో తిరుగుతున్నారు. ఆ బెంజ్ కారుపై ఎమ్మెల్యే స్టికర్ ఉంది. ఇంతకంటే మంత్రిగారికి ఏమైనా ఆధారాలు కావాలా.. ? ఈఎస్ఐ కేసులో ముద్దాయిగా ఉన్న వ్యక్తి బహుమతి ఇవ్వడమేంటి..? కోటి రూపాయలు విలువ చేసే కారు ఇచ్చాడంటే ఏదో ఆశించే ఉంటాడు కదా..? ఇప్పటికైనా మంత్రి నైతిక బాధ్యత వహించి రాజీనామా చేయాలి. అచ్చెన్నాయుడు విషయంలో ఎలాంటి ఆధారాలు చూపకుండానే అరెస్ట్ చేశారు. ఈ కేసులో ఎలాంటి ఆధారాలైనా ఇచ్చేందుకు మేం సిద్ధంగా ఉన్నాం. అవినీతి నిరోధక శాఖ టోల్ ఫ్రీ నెంబర్కు ఫోన్ చేస్తే ఎలాంటి స్పందన లేదు. మాజీ మంత్రికే ఇలాంటి పరిస్థితి ఎదురైతే.. సామాన్యుల పరిస్థితేంటి..? మంత్రి జయరామ్... కర్నూలు జిల్లాలో భూకబ్జాలకు కూడా పాల్పడుతున్నారు. మాపై ప్రభుత్వం ఎలాంటి కేసులు పెట్టినా భయపడేది లేదు "
- అయ్యన్నపాత్రుడు, మాజీ ఏపీ మంత్రి
నిజాలు బహిర్గతం.. మంత్రి జయరామ్ రాజీనామా పెట్టాలి : అయ్యన్నపాత్రుడు ఇవీ చూడండి : డిప్యూటీ తహసీల్దార్ పదోన్నతులపై సర్కార్ కసరత్తు
