ఒకే పన్ను విధానాన్ని అమలు చేయాలి: ఏఐటీయూసీ

పన్ను వ్యత్యాసం వల్లే ఆర్టీసీపై ఏటా రూ.622 కోట్ల అదనపు భారం పడుతుందని ఏఐటీయూసీ నాయకులు ఆందోళనకు దిగారు. రైల్వేకు, ఆర్టీసీకి ఒకే పన్ను విధానాన్ని అమలు చేయాలని డిమాండ్ చేస్తూ.. హైదరాబాద్ కలెక్టరేట్ ముందు నిరసన చేపట్టారు.

తెలంగాణ ఆర్టీసీపై కేంద్ర ప్రభుత్వం వివక్షను మానుకోవాలని.. ప్రజా రవాణాను కాపాడాలని ఏఐటీయూసీ డిమాండ్ చేసింది. ఒకే దేశం ఒకే పన్ను అని నినదించే కేంద్రం... రైల్వేకు డీజిల్​పై 4 శాతం పన్ను విధించి, ఆర్టీసీకి మాత్రం 31.83 శాతం విధించడం దారుణమని ఏఐటీయూసీ నాయకులు విమర్శించారు. కేంద్ర వైఖరికి నిరసనగా నాంపల్లిలోని హైదరాబాద్ కలెక్టరేట్ ముందు వారు ఆందోళనకు దిగారు.

ఈ పన్ను వ్యత్యాసం వల్ల ఆర్టీసీపై ఏటా రూ.622 కోట్లు అదనపు భారం పడుతుందని.. దాని ప్రభావం ప్రజా రవాణాపై ఉంటుందని పేర్కొన్నారు. కేంద్రం తన వైఖరి మార్చుకొని ఒకే పన్ను విధానాన్ని అమలు చేయాలన్నారు. డీజిల్​,పెట్రోల్​ను జీఎస్టీ పరిధిలోకి తీసుకురావాలని ఏఐటీయూసీ నాయకులు డిమాండ్ చేశారు.

ఇదీ చూడండి: రూపాయి ఖర్చు లేకుండా కిడ్నీలకు చికిత్స : ఇంద్రకరణ్‌ రెడ్డి