NIRANJAN REDDY REVIEW ON AGRI ACTIVITIES: రాష్ట్రంలో వ్యవసాయ, ఉద్యాన, మార్కెటింగ్, సహకార శాఖలు, విశ్వవిద్యాలయాలు, అనుబంధ శాఖల కార్యకలాపాల పురోగతిపై ఆయా శాఖల అధికారులతో వ్యవసాయ శాఖ మంత్రి సింగిరెడ్డి నిరంజన్రెడ్డి మంగళవారం విస్తృతంగా చర్చించారు. అత్యధిక లాభసాటి ఉపాధి రంగంగా వ్యవసాయం నిలిచే దిశగా ప్రభుత్వం అన్నిరకాల చర్యలు తీసుకుంటుందని తెలిపారు. పంటల వైవిధ్యీకరణతోపాటు వ్యవసాయ పరిశోధనా కేంద్రాల్లో పరిశోధనలు వేగవంతం చేసున్నామని చెప్పారు. అంతర్జాతీయంగా తెలంగాణ పత్తికి డిమాండ్ ఉన్న దృష్ట్యా సీఎం కేసీఆర్ ఆదేశాల మేరకు ఆదిలాబాద్‌లో తెలంగాణ పత్తి పరిశోధనా కేంద్రం తక్షణ ఏర్పాటుకు నిర్ణయం తీసుకున్న తరుణంలో మౌలిక వసతుల కల్పన, పరిశోధనకు సహకారం అందిస్తామన్నారు.
మన దగ్గరే కంది విత్తన పరిశోధన కేంద్రం...
దేశంలో నాణ్యమైన అధిక దిగుబడులిచ్చే కంది పంట అభివృద్ధి కోసం తాండూరులో కంది విత్తన పరిశోధనా కేంద్రం ప్రత్యేకంగా అభివృద్ధి పరచనున్నామని తెలిపారు. వ్యవసాయంలో తెలంగాణకు అవసరమైన ఆధునిక సాంకేతిక పరిజ్ఞానం గుర్తించి ఎలా వినియోగించుకోవాలో ఆలోచించాలని సూచించారు. దీర్ఘకాలిక ప్రణాళికలో భాగంగా కేసీఆర్ గతంలో చెప్పినట్లుగా పంట కాలనీల అభివృద్ధి కోసం ప్రత్యేకంగా అరటి, మిరప, విత్తన పత్తి, కంది, మామిడి, బంగాళాదుంప, ఇతర కూరగాయల సాగుకు గల అవకాశాలు పరిశీలించాలని చెప్పారు. హైదరాబాద్ చుట్టూ కాకుండా రాష్ట్రంలో ఇతర పట్టణాలు, కార్పొరేషన్ల పరిధిలో కూరగాయల సాగు ప్రోత్సహించేందుకు చర్యలు తీసుకోవాలన్నారు.