విషాదం.. ఇలాంటి పరిస్థితి ఏ తండ్రికి రాకూడదు

కొన్ని సంఘటనల గురించి చెప్పడానికి మాటలు రావు. రాయడానికి అక్షరాలు సరిపోవు. ఏ తండ్రి అయినా తన కూతురుకు చిన్నదెబ్బ తగిలితేనే తట్టుకోలేడు. అలాంటిది ఏపీలోని విశాఖ జిల్లా మన్యంలోని గిరి గ్రామంలో ఓ తండ్రి తన కూతురు మృతదేహాన్ని 3 కిలోమీటర్లు చేతులపై మోసుకెళ్లాడు. కూతురు చనిపోయిందని బాధపడాలో.. ఇంత దీనస్థితిలో బతుకుతున్నామని సిగ్గుపడాలో తెలియని పరిస్థితి. నిజంగా ఇలాంటి దుస్థితి ఏ తండ్రికి రాకూడదు. పాలకులు మారినా... తమ పరిస్థితి మారదు అని అమాయక గిరిజనులు అంటుంటారు. ఈ ఘటన చూస్తే... అది నిజమే అని మీరూ అంటారు.

ఏపీలోని విశాఖ జిల్లా మన్యంలోని గిరి గ్రామంలో ఓ విషాదకర ఘటన చోటుచేసుకుంది. అనారోగ్యంతో మృతి చెందిన ఏడేళ్ల కుమార్తెను ఓ తండ్రి 3 కిలోమీటర్ల దూరం చేతులతో మోసుకుంటూ స్వగ్రామానికి తీసుకెళ్లాడు. మన్యంలోని డుంబ్రిగూడ మండలంలో వయ్యి గ్రామానికి చెందిన ఏడేళ్ల ఎలీచా... అనారోగ్యంతో అరకులోయ వైద్య కేంద్రంలో మృతిచెందింది. అంబులెన్స్​లో కించుమండ సంత సమీపంలోని వంతెన వరకు తీసుకువచ్చారు.

హుద్​హుద్ తుపాను సమయంలో ఆ వంతెన నేలకూలింది. గత్యంతరం లేని పరిస్థితుల్లో కుమార్తె మృతదేహాన్ని తండ్రి బాబూరావు 3 కిలోమీటర్ల దూరంలో ఉన్న గ్రామానికి రెండు చేతులతో మోసుకుంటూ తీసుకెళ్లాడు. కన్నబిడ్డ ప్రాణం పోయిందన్న బాధ వెంటాడుతున్నా... తప్పని పరిస్థితుల్లో మృతదేహాన్ని మోసుకుంటూ వెళ్లటం అందరినీ కంటతడి పెట్టించింది. ఏ తండ్రికీ ఇటువంటి పరిస్థితి రావొద్దని స్థానికులు ఆవేదన చెందారు.

ఇవీచూడండి :విషాదం... తల్లి, కూతురు ఆత్మహత్యాయత్నం