పాఠశాలకు వెళ్లివస్తుండగా... బాలుడిపై కుక్కల దాడి

కుక్కల బెడద కొన్నిరోజులుగా నగరవాసుల్ని ఆందోళనకు గురిచేస్తోంది. తాజాగా అల్వాల్​ పీఎస్​ పరిధిలోని వైష్ణవిమాత దేవాలయం సమీపంలో ఓ విద్యార్థిపై కుక్కలు దాడికి పాల్పడ్డాయి.

సికింద్రాబాద్ అల్వాల్​ పీఎస్​ పరిధిలోని ఎమ్​ఈఎస్​ కాలనీలో నివాసముంటున్న విశ్వజిత్​ అనే విద్యార్థి ఆరోతరగతి చదువుతున్నాడు. పాఠశాలకు వెళ్లి వస్తున్న సమయంలో ఒక్కసారిగా కుక్కలు దాడిచేయడం వల్ల అతను తీవ్రగాయాలపాలయ్యాడు. గమనించిన స్థానికులు కుక్కల్ని తరిమి విశ్వజిత్​ను ఆస్పత్రికి తరలించారు. ప్రస్తుతం బాలుడి ఆరోగ్యం నిలకడగా ఉందని వైద్యులు తెలిపారు. కొన్నిరోజులుగా కుక్కల బెడద తమని ఆందోళనకు గురిచేస్తోందని, జీహెచ్​ఎంసీ అధికారులకు ఎన్నిసార్లు చెప్పినా... ఎలాంటి చర్యలు తీసుకోవడం లేదని కాలనీవాసులు ఆగ్రహం వ్యక్తం చేస్తున్నారు.

• ఇదీ చూడండి : మహానగరంలో సీజన్​ మొత్తంలోనే అత్యధిక వర్షపాతం నమోదు