Reward: కుక్క కనిపించగానే కాల్​ చేస్తే రూ.30 వేల రివార్డు.. త్వరపడండి!

పన్నెండేళ్ల నుంచి అల్లారుముద్దుగా పెంచుకున్న శునకం తప్పిపోయిందని ఓ జంతు ప్రేమికురాలు అల్లాడిపోయింది. కనిపించకుండా పోయిన రోజు నుంచి ప్రతీ చోట వెతుకుతూనే ఉంది. కనపడిన వాళ్లందరినీ.. తన కుక్క అగుపించిందా అని అడుగుతూనే ఉంది. కనిపిస్తే చెప్పండని వేడుకుంటూనే ఉంది. ఏడు నెలలయినా.. దొరకకపోవటంతో... తన కుక్కను వెతికేందుకు జనాలు ఆసక్తి చూపాలని సరసమైన రివార్డు ప్రకటించింది.

సైదాబాద్​ ఘటన నిందితున్ని పట్టిస్తే... రూ.10 లక్షల రివార్డు అందిస్తామని హైదరాబాద్​ పోలీసులు ప్రకటించిన విషయం తెలిసిందే. డబ్బులకు ఆశపడైనా... నిందితున్ని పట్టించేందుకు ప్రజలు ఆసక్తి చూపిస్తారనే స్ట్రాటజీతో పోలీసులు వ్యవహరించి ఉండొచ్చు. ఇదే తరుణంలో ఓ జంతుప్రేమికురాలు కూడా ఓ రివార్డు ప్రకటించింది. తప్పిపోయిన శునాకాన్ని పట్టించేందుకు ఆసక్తి చూపించాలనో.. వెతికిచ్చినందుకు ప్రొత్సాహకం ఇవ్వాలనో.. తన కుక్కపై ఏకంగా రూ.30 వేల రివార్డు ప్రకటించింది. అసలు విషయమేంటంటే...

పన్నెండేళ్లుగా పెంచుకున్న ప్రేమ..

హైదరాబాద్ ఖైరతాబాద్ చింతల్ బస్తీ ప్రాంతానికి చెందిన పుష్పప్రియ జంతు పేమికురాలు. చిన్నతనం నుంచి ఇంట్లో పలు రకాల జంతువులను పెంచుకుంటున్నారు. ఏడాది వయసున్న డాలీని తెచ్చుకుని 12 ఏళ్లుగా పెంచుకుంటున్నారు. సాధారణంగా రోజూ తనంతట తానే నేచర్​కాల్​కి వెళ్లి వచ్చే డాలీ.. ఫిబ్రవరి 7న మాత్రం ఎందుకో తిరిగి ఇంటికి రాలేదు. ఆ రోజు నుంచి కుటుంబ సభ్యులతో కలిసి పుష్పప్రియ వెతుకుతూనే ఉంది. ఖైరతాబాద్ పరిసరప్రాంతాల్లో, న్యూస్​పేపర్లలో కరపత్రాలు కూడా పంచింది. అయినా... ఇప్పటికీ ఆచూకీ లభించలేదు.

ఎలాగైనా పట్టుకోవాలని...

జీహెచ్​ఎంసీ అధికారులను ఆశ్రయించినా లాభం లేకపోయింది. పోలీసుల వద్దకు వెళ్లి సీసీటీవీ దృశ్యాలు చూసినా.. ఫలితం కనిపించలేదు. కనిపించిన ప్రతీ ఒక్కరిని.. ఫొటో చూపిస్తూ తమ కుక్క అగుపించిందా అని అడుతూనే ఉంది. అందరూ... "మాకేం తెలుసు మీ కుక్క గురించి.. అయినా మాకేందుకు ఈ కుక్క లొల్లి" అంటూ నిర్లక్ష్యంగా సమాధానాలు చెప్పటం గమనించారు. ఏడు నెలలు గడుస్తున్నా.. డాలీ ఆచూకీ కూడా దొరకట్లేదు. ఎంతో అల్లారు ముద్దుగా పెంచుకున్న తన కుక్కు ఆచూకీని ఎలాగైనా.. పట్టుకోవాలని నిశ్చయించుకుంది.

కనిపించినప్పుడు ఫోన్​ చేస్తే చాలు..

ఏం లాభం లేకుండా ఎవరు ఎలాంటి పని చేయరని అనుకుందో ఏమో.. తన కుక్కను వెతికిపెట్టిన వాళ్లకు కూడా కొంత లాభం చేకూర్చాలనుకుంది. అంతే కాకుండా... తమ కుక్కను వెతికేందుకు జనాలు కొంత ఆసక్తి చూపేందుకు ఓ ఆలోచన చేసింది. తమ కుక్క కనిపించగానే ఫొన్​ చేస్తే... ఏకంగా రూ.30 వేలు రివార్డు ఇస్తానని ప్రకటించింది పుష్పప్రియ. దయచేసి తమ కుక్క ఎక్కడ కనిపించినా.. 9581054010 నంబర్​కి కాల్​ చేసి సమాచారం ఇవ్వాలని వేడుకుంది.

ఇదీ చూడండి: