విద్యుత్ వాహనాలు కొనుగోలు చేయాలంటే.. ముందుగా వాహనదారులు ఆలోచించేది ఛార్జింగ్ పాయింట్లు. వీలైనన్ని ఛార్జింగ్ పాయింట్లు అందుబాటులో లేకపోవడం వల్ల చాలా మంది విద్యుత్ వాహనాలు కొనుగోలు చేసేందుకు వెనుకంజ వేస్తున్నారు. ఇప్పుడు ఆ అవసరం లేదు. గ్రేటర్ హైదరాబాద్లో 30 ఛార్జింగ్ కేంద్రాలను అందుబాటులోకి తీసుకురాబోతున్నట్లు పునరుత్పాదక ఇంధన అభివృద్ధి సంస్థ(రెడ్కో) ప్రకటించింది. ఇప్పటికే వీటికి సంబంధించిన ఏర్పాట్లు కూడా జరుగుతున్నాయని ఆ సంస్థ వైస్ ఛైర్మన్ జానయ్య తెలిపారు.
విద్యుత్ వాహనదారులకు శుభవార్త... 30 ఛార్జింగ్ స్టేషన్ల ఏర్పాటు
విద్యుత్ వాహనాలు వినియోగించే వాళ్లు ఇక రోడ్లపై రయ్ రయ్ మని దూసుకెళ్లొచ్చు. ఛార్జింగ్ కోసం చింతించాల్సిన అవసరమే లేదు. గ్రేటర్ హైదరాబాద్లో 30 ఛార్జింగ్ స్టేషన్లు అందుబాటులోకి రాబోతున్నాయి. వీటికి సంబంధించిన ఏర్పాట్లు కూడా చకచక కొనసాగుతున్నాయి. ఫిబ్రవరి రెండో వారంలో ఈ స్టేషన్లను వినియోగించుకునే వెసులుబాటు కలుగుతుంది.
30 charging stations in electric vehicles in hyderabad
ఫేమ్-2 పథకం కింద ప్రజలు వినియోగించేందుకు వీలుగా 118 విద్యుత్ ఛార్జింగ్ కేంద్రాలను హైదరాబాద్లో, 10 కేంద్రాలను కరీంనగర్-వరంగల్లలో ఏర్పాటు చేసేందుకు ప్రణాళికలు రూపొందిస్తున్నారు. దీనికి సంబంధించిన సర్వే కూడా కొనసాగుతోంది. 2021 జూన్ వరకు ఈ స్టేషన్లు అందుబాటులోకి తీసుకురావాలనే లక్ష్యంతో అధికారులు ముందుకెళ్తున్నారు.
ఫేమ్-1 కింద పలు ప్రభుత్వ కార్యాలయాల్లో 30 విద్యుత్ ఛార్జింగ్ కేంద్రాలను అందుబాటులోకి తీసుకురావాలని చూస్తున్నట్లు జానయ్య తెలిపారు. వీటిని ఫిబ్రవరి రెండో వారంలోపు పూర్తి చేయనున్నట్లు ఆయన తెలిపారు. టీఎస్ ఆర్టీసీ ముషీరాబాద్ డిపోలో-2, టీఎస్ ఆర్టీసీ ఉప్పల్ డిపోలో-3, టీఎస్ఐఆర్సీ రాజేంద్రనగర్-1, ట్రాన్స్కో విద్యుత్ సౌధ-2, ట్రాన్స్కో శిక్షణ కేంద్రం-1, ఎన్ఎస్ఐసీ కుషాయిగూడ-2, బీఆర్కే భవన్-2, టీఎస్ రెడ్కో భవన్-1, ఈఎస్సీఐ-2, సీఐటీడీ బాలానగర్-2, సీఐపీఈటీ చెర్లపల్లి-2, ఎన్ఐ-ఎంఎస్ఎంఈ యూసఫ్ గూడ-2, టీయూఎఫ్ఐడీసీ-1, టీఎస్ ఎస్పీడీసీఎల్-2, హెచ్ఎండీఏ-4, టీఎస్ రెడ్కో భవనం-1 అందుబాటులోకి రానున్నాయి.