కాంగ్రెస్కు కలిసి రాని 2019! తెలంగాణ కాంగ్రెస్కు ఈ ఏడాది ఆశించిన మేలు చేకూర్చలేదు. చేదునే మిగిల్చింది. ఎందులోనూ కాంగ్రెస్ నేతలు పూర్తి స్థాయి విజయాన్ని చేజిక్కించుకోలేకపోయారు. 2018 చివరలో జరిగిన ముందస్తు అసెంబ్లీ ఎన్నికల్లో... తెరాస, భాజపాయేతర పార్టీలతో ఏర్పాటైన ప్రజా కూటమి ఫలితాలు తారుమారు కావడం వల్ల... 2019 ఆరంభం నాటికి చిన్నాభిన్నమైంది.
తమ వారిని కాపాడుకోలేక పోయారు
హస్తం గుర్తుపై గెలిచిన 12 మంది ఎమ్మెల్యేలు గులాబీ కండువా కప్పుకున్నారు. అసెంబ్లీ ఎన్నికల్లో గెలుపొందిన 19 మందిలో 12 మంది తెరాసలోకి, ఉత్తమ్‌కుమార్‌ రెడ్డి రాజీనామాతో కేవలం ఆరుగురు మాత్రమే మిగిలారు. ఆ పార్టీ ఊహించని రీతిలో గట్టి ఎదురుదెబ్బ తగిలి ప్రతిపక్ష హోదాను కూడా కోల్పోయింది. ఉన్న ఆరుగురిలో మునుగోడు ఎమ్మెల్యే కోమటిరెడ్డి రాజగోపాల్‌ రెడ్డి భాజపాకు అనుకూల ప్రకటనలు చేయడం, ఆ పార్టీలో చేరుతున్నట్లు ప్రచారం జరగడం లాంటి అంశాలతో ఆయన కాంగ్రెస్ పార్టీకి అంటీముట్టనట్లు ఉంటున్నారు.
ఎవరికి వారే...
మిగిలిన అయిదుగురు ఎమ్మెల్యేల్లోనూ ఐక్యత కొరవడి ఎవరికి వారే ఎమునా తీరే అన్నట్లు ఉంటున్నారు. అంతర్గత కుమ్ములాటల్లో... మాజీ మంత్రి డీకే.అరుణ, మాజీ ఎమ్మెల్సీ పొంగులేటి సుధాకర్ రెడ్డితోపాటు అనేక మంది మాజీ ఎమ్మెల్యేలు భాజపాలో చేరారు. సబితా ఇంద్రారెడ్డి, సునీతా లక్ష్మారెడ్డి లాంటి నేతలు అధికార తెరాసలో చేరారు. సీనియర్‌ నేతలు జైపాల్‌రెడ్డి, మాజీ మంత్రి ముఖేశ్ గౌడ్ల మృతితో పార్టీకి తీరని లోటు ఏర్పడింది. ఫిరాయింపులపై సీఎల్పీ నేత భట్టి విక్రమార్క ప్రజాస్వామ్య పరిరక్షణ యాత్ర చేసినా.. అధికార పార్టీ ఫిరాయింపుల అంశాన్ని జనంలోకి తీసుకెళ్లలేక పోయారు.
వరుస అపజయాలు
పార్లమెంట్‌ ఎన్నికల్లో మూడు స్థానాల్లో విజయం సాధించడంతో కాంగ్రెస్ పార్టీ కాస్త ఊపిరిపీల్చుకుంది. కొన్నిస్థానాల్లో మూడో స్థానంతో సరిపెట్టుకోవాల్సిన పరిస్థితి ఏర్పడింది. హుజూర్‌నగర్‌ ఎమ్మెల్యేగా ఉత్తమ్ కుమార్‌రెడ్డి రాజీనామా చేయడం వల్ల ఉపఎన్నికల బరిలోకి దిగిన ఆయన భార్య పద్మావతి ఓటమి పాలయ్యారు. మండల, జిల్లా పరిషత్ ఎన్నికల్లోనూ అంతగా ప్రభావం చూపలేకపోయింది. ఒక్క జడ్పీ ఛైర్మన్ పదవిని కూడా సాధించలేకపోయింది. వరుస దెబ్బలతో కోలుకోలేని పరిస్థితులు నెలకొన్నాయి. జాతీయ స్థాయిలో ఏఐసీసీ తీసుకునే నిర్ణయాలను రాష్ట్రంలో క్షేత్రస్థాయిలోకి తీసుకెళ్లలేకపోయారు. స్థానిక పరిస్థితులు తెలంగాణ కాంగ్రెస్‌ను ఇబ్బందులకు గురిచేశాయి.
ప్రతిపక్ష పాత్ర పోషించలేదు!
ఏఐసీసీ అధ్యక్ష పదవికి రాహుల్ గాంధీ రాజీనామా చేయడం.. అధ్యక్షుడు ఎవరో తెలియక కొంతకాలం పార్టీలో స్తబ్దత నెలకొంది. ఇంటర్ బోర్డు వ్యవహారం, నల్లమల యూరేనియం తవ్వకాలు, ఆర్టీసీ సమ్మె తదితర విషయాల్లో ప్రతిపక్ష పాత్ర పోషించలేక పోయింది. యురేనియం తవ్వకాలకు వ్యతిరేకంగా కాంగ్రెస్ పోరాడినప్పటికీ... జనసేన ఏర్పాటు చేసిన అఖిలపక్ష సమావేశానికి కాంగ్రెస్ నేతలు హాజరు కావడం... ఆ పార్టీలో చిన్నపాటి తుపానే సృష్టించింది. మల్కాజిగిరి ఎంపీ రేవంత్ రెడ్డి, ఇతర నేతల మధ్య మాటల తూటాలు పేలాయి.
కొరవడిన సమన్వయం
ఆర్టీసీ సమ్మె సమయంలో కార్మికులకు మద్దతుగా ప్రగతిభవన్‌ ముట్టడికి రేవంత్ రెడ్డి పిలుపునిస్తే.. కొందరు సీనియర్లు వ్యతిరేకించారు. తెరాస ప్రభుత్వంపై, సమస్యలపై పోరాటం చేయడం కానీ, ఎన్నికల సమయంలో తెరాస ఇచ్చిన హామీల అమలుకు ఒత్తిడి పెంచడం కానీ చేయలేకపోయింది. కేవలం మీడియా సమావేశాలకు, ఇష్టాగోష్ఠిలకే పరిమితమైంది. సమావేశాల పేరుతో గోల్కొండ హోటల్, గాంధీ భవన్‌లకే పరిమితమై సమయం వృథా చేస్తూ వచ్చారే తప్ప నేతల మధ్య సమన్వయం, చిత్తశుద్ధి లేక ఏ ఒక్క పనిని తీవ్రంగా పరిగణించిన దాఖలాలు లేవు. ఈ నేపథ్యంలో 2020లో ఆ పార్టీ పరిస్థితులు ఏలా ఉంటాయో వేచి చూడాలి.
ఇదీ చూడండి: రివ్యూ 2019: సంచలనాలకు కేరాఫ్ అడ్రస్ మోదీ ప్రభుత్వం
