గతేడాది నవంబర్‌, డిసెంబర్‌ నెలల్లో పెద్దపులులు ఆవాసం కోసం భీంపూర్‌, తాంసి, తలమడుగు, జైనథ్‌, ఆదిలాబాద్ గ్రామీణ మండలాల్లో సంచరించాయి. పెద్దపులులు డిసెంబర్‌, జనవరి, ఫిబ్రవరి మాసాల్లో స్థావరాలను మార్చుకుంటాయి. వాటికి అనువైన ఆవాసాల కోసం అన్వేషిస్తుంటాయి. అందులో భాగంగానే గతంలో తిప్పేశ్వర్‌ నుంచి వచ్చిన పెద్దపులి... గోట్కూరి వాగువద్ద, సావర్గాం, బండల్‌ నాగాపూర్‌ ఎర్రమట్టి క్వారీల వద్ద, జందాపూర్‌ గ్రామ సమీపంలోని మాంగనీసు క్వారీ వద్ద సంచరించింది.
సమన్వయ లోపమే ప్రధాన కారణం..
అప్పట్లో తిప్పేశ్వర్‌ నుంచి వచ్చిన పులి మెడలో రేడియేషన్ బెల్ట్ ఉండడం వల్ల సాంకేతిక పరిజ్ఞానంతో మహారాష్ట్ర అటవీశాఖ పులి కదలికలు గుర్తించింది. కానీ ఇప్పుడు సంచరిస్తున్న పులులకు రేడియేషన్ బెల్ట్ లేదు. దీంతో పులుల కదలికలు గుర్తించడం కష్టంగా మారింది. పులిని నేరుగా చూసినప్పుడో, మూగజీవాలు మృత్యువాత పడినప్పుడో తప్ప పులి సంచారాన్ని గమనించడం కుదరట్లేదు. పైగా ఇక్కడి అటవీశాఖ అధికారులు- మహారాష్ట్ర అటవీశాఖాధికారుల మధ్య సమన్వయలోపం ప్రజలలో పులిభయం మరింత పెంచుతోంది. ఏ మూల నుంచి పులి దాడి చేస్తుందో అన్న భయంతో.. ప్రజలు పొలాల దగ్గరికి వెళ్లాలంటేనే భయపడిపోతున్నారు.
వేల క్వింటాళ్ల పంట.. పులి పాలయింది!
పులి భయంతో భీంపూర్‌ మండల పరిధిలోని గొల్లఘాట్‌, తాంసి(కె), ఇందూర్‌పల్లి, పిప్పల్‌కోటి, అర్లి(టి), అంతర్‌గావ్‌ శివారులో దాదాపుగా రెండున్నర వేల ఎకరాల్లో పంటను పొలాల్లోనే వదిలేశారు. సూమారు 12,500 క్వింటాళ్ల పత్తి, క్వింటాకు కనీసం రూ.5వేల ధర పలికినా.. రూ.6.25 కోట్లను రైతులు నష్టపోవాల్సి వచ్చింది. ప్రభుత్వం ఇచ్చే పరిహారం మాట దేవుడేరుగు.. ముందు ప్రాణాలకు రక్షణ కల్పించండి మహాప్రభో అని వేడుకుంటున్నారు.
సిబ్బంది కూడా వణికిపోతున్నారు..
40 మంది సిబ్బందితో.. పెన్‌గంగా నదీ పరీవాహక ప్రాంతాల్లో గాలింపు చేపట్టింది. విధులు నిర్వహిస్తున్నారనే మాటేగానీ... అటవీశాఖ సిబ్బంది కూడా పులి భయంతో వణికిపోతున్నారు. పులుల సంచారాన్ని గుర్తించే ఆధునిక సాంకేతిక పరిజ్ఞానం, సరిపడా ఆయుధాలు అందుబాటులోకి లేకపోవడం వల్ల అడవిలోకి వెళ్లాలంటే అటవీ సిబ్బంది కూడా వణికిపోతున్నారు.